We Elẏzabeth von der gnade godes Greven frederikes husvrowe von orlamu(n)dhe / vnde Grevinne to aschersleue Bekennet in dissem jegenwardighen breve . vnde dvt we/telik . alle den de en sen vnde horen . Dat we mit vses leven herren Greven frede/rikes von orlamn(e)de . de hir vore bescreven is . willen . en bedet vnde biddet jvc vro/men ludhen deme Radhe . vnde den Buͦrgheren gemene to aschersleue . dat je hul-/deghen . sweme de deken . odher twene dvmherren von deme dvͦme to halberstat / jvc hetet de jvc dissen bref bringhet . alse we jvc silven mit deme mvndhe geheten / vnde gebeden hebbet . do je dat so late we jvc ledich vnde los des lovedes vnde / der hvldinghe de je vns gedan hebbet To ener betughinghe disser dinghe / hebbe we dissen bref gevestenet laten mit vsem jngesegele . Disse bref is / gegeven na godes bort Dusent jar . drihvndert jar . jn deme twei vnde / twintegesten jare des mandages na der pinkestweken