IN nomi(n)e d(o)m(ini) amen . Wie vor Jslebe von der goddeschenaden eẏn Ebbedische des goddeshuses vnser / vrowen buten der muren tho aschersleue . vn(de) vor Gherderut de p(ri)orinne dar tho de samenu(n)ge der / vrowen ghemeyliken des seluen goddeshuses . Beken(n)en vn(de) bethugen alle den de dessen brif sen vn(de) / horen . Dat alle werre vn(de) kẏf den wi hadden vn(de) hebbe(n) ghehat mit den borge(re)n vter stat vmme de scole / vnser parren wart vn(de) is ald(us) vorliket Dat se de vorbenomeden borg(er)e nu tho desser iegenwardeghen / thẏt scullen keysen vn(de) sethten eynen meister de on vn(de) oren kyndere(n) bequeme si vn(de) behage . deme sculle(n) / wi vn(de) vnse prouest de scole lygen dorch ore bede willen . Swe(n)ne auer de meister steruet oder vo(n) der scole / komet mit welkerleẏge redeleker sake dat si . Dar na iu(m)mer mer so sculle wi vn(de) vnse prouest de walt / hebbe(n) dat wi de scole lygen weme wi wellen vn(de) vns gut dunket . wellic meister auer den wi setthen nicht / bequeme ne were noch euene queme den borgere(n) vn(de) oren kẏnde(re)n den sculle wi af setthen vn(de) setthen eyne(n) / andere(n) . vn(de) de marc geldes de von der scole ghinc dar men de kerke(n) mede besanc in der nyen stat vn(de) alle / vnrecht in der scole scal aue wesen an allen stucken ledich vn(de) vri . Ouer dessen dingen do de ghedegheding(et) / worden waren mit vnseme proueste von vnser wegene desse acbaren lude likeder wis alse scheyde lude eẏn(er) / sake . her heydeke de p[...]ban von daldorpe . her hinric vn(de) her arnolt stame(re)n . her brun vog(et) . her hinric / vomme houe Ridd(er)e . herman von wini(n)ge eyn borge(re) . vn(de) oppe dat alle desse vorbenomeden ding von / vnses goddeshuses wegene vn(de) vnser stede werden ghehalden der stat vn(de) vnghebroke(n) . so hebbe wi tho / eyner orekunde dessen bref dar op ghegheuen . na goddes bort Dusent iar Druhundert iar an deme / vyuentwintegesten iare . an sente pete(re)s vn(de) paweles dage . vn(de) besegelet mit dem i(n)ghesegele vnses coue(n)tes