We hans vn(de) bosse brode(re) gheheiten de Marschalke bekennen in dissem openem breue vor / alle den de on sehen vn(de) horen lesen dat we eẏndrechtliken vn(de) mit gudeme rade vn(de) vuͦl/borde vns(er) eruen hebben vorkoft vn(de) ghelaten den eirbaren luden dem rade vn(de) den bor/gheren ghemeẏne* der stad tho aschersleue vnsen leddighen vrẏgen hof de tho wichvelde / lyt vn(de) van aldere wichvelde is ghewest vn(de) an vns van vnsen elde(re)n also ghekomen is vn(de) dar/mede be eruet sint vppe der brede vor sunte Johanses Dore in der vorbenanten stad tho / aschersl(eue) vor sestich mark b(ra)ndeborg(esches) silueres de vns wol be[talet] sint disses benanten / houes vrẏ leddich vn(de) to wẏchveldes rechte also we dar mede beeruet sint sculle we vn(de) / willen des rades vn(de) der stad ghemeẏne rechte gheweren sin vor allerleẏge redeliker / ansprake wuͦr wanne vn(de) wuͦ dicke on des nod is vn(de) se dat van vns eschen des to be/kantnisse vn(de) orku(n)de disse dingh stede vn(de) gantz an arghelist van vns vn(de) vns(en) eruen tho hal/dende dem eirghenanten rade vn(de) der stad ghemeẏne to aschersl(eue) so hebbe we¹ vnse jnghes(egel) / vor vns vn(de) vnse nakomelinghe in eruetal mit willen witschap vn(de) vulbord vnser eruen / ghehenghet laten an dissen bref Nach Cristi ghebord düsent iar dre huͮndert iar in / dem tweẏn vn(de) seuenteghesten iare in sunte Dẏonisius daghe des hilghen Merteleres