Jn godes namen amen .. We her hans prouist . Gerthruͦd ebdesche . Marga(r)eta p(ri)orinne . ku(n)neguͦnd kelnerẏnne vnd(e) de / sammẏge ghemeẏne des grawen closteres vor aschersleue Bekennen openbar jn dissem jeghenwerdig(e)n bryͤue alle / den dyͤ en seẏn edir horen lesen . dat wẏe dorch god vnd(e) dorch suͦnderliker vru(n)tscap willen vnd(e) ok truͦwer gebede / der vorsichtig(e)n wẏse(n) luͦde des rades in der stat tuͦ aschersle(uen) hebb(e)n irlouet vnd(e) vnsen guͦden willen dar tuͦ ene ghe/gheuen dat sye buͦwet hebb(e)n eẏne(n) altar inder parre kerken tuͦ sinte stephane dye ge wyget is indye ere des heren hilg(e)n / sente paules des hilg(e)n apostel . sente joh(ann)es ew(a)ngelist(e)n . sente michael . sente eustachius . sente leonard(us) . sente Jostes . / vnd(e) sente gerthrudis . den sye be wedemet hebb(e)n met ses brandebuͦrges mark geldes jarliker guͦlde Dyssen altar / hebbet disse vorghenate rat vns tuͦ ghe leẏt dorch suͦndirliker guͦnste willen alzo dat wye den altar vnd(e) vnse na/komelynge scolen one vor lygen wem wẏe willen allzo dicke alzo des not is alzo dat it der parre vnd(e) der stat nicht / schedelik edir hynderlik sye an erem godes deẏnste vnd(e) dat dye misse ge halden werde alzo alze hẏr na beschreue(n) steẏt / disse missen scal dye priͤster halden alle daghe dor dat gancze jar an allen hẏnder suͦndir lẏues not vnd(e) scal de leste / misse sin so dat sye vte sye wan it recht eten tẏt sẏ man vaste edir nicht ok en scal dye priͤster nyͤma(n)de bydden disse / missen tuͦ haldene dye plichtich is missen tuͦ halden in disser parre dar met sin misse ge hẏndert werde dye dye missen / vor en helt vnd(e) disse missen scal me halden alzo dat sye der parre vromelik sye vnd(e) nicht schedelik vnd(e) wat ghe/opperet wert dat scal he antwerden vnsem prouiste ok scal disse priͤster vnsem prouiste vnd(e) vnsir parre sẏn tuͦ / deẏnste an allen tẏden dorch god wen des not is Ok suͦnderliken in allen dag(e)n wan me pleget tuͦ gande herlike / p(ro)cessien wanne vnse prouist sulue(n) mede geẏt . en gẏnge he ok nicht mede vnd(e) beneẏme eme dat not gelyke wol / scolde hye doch mede gan Ok en scal disse prester neẏne almose neme(n) it en sye van suͦnderliker guͦnste wegen vnses / prouistes vnd(e) der ebdeschen ok en scal hẏe neynerleyge seẏlgherede noch testame(n)t van nẏemande nemen it en sye / denne dat vnse prouist vnd(e) vnse cappellane eẏrst af ghedeylet sẏn dar na so irloue wye eme tuͦ nemene cappellanes / deẏl vnd(e) dar en bouen nicht Ok en scal syͤk disser prester an vnsir parre rechte noch an dissen vor schreuen stuͦcken / nicht vor suͦmen noch vorgryͤpen schege it dar en bouen wan wye edir vnse na komelẏnge it van em eschen dat scal / he be weren mit sẏnem eyde dat he sik hyr ane be waret hebbe wanne it scal neyma(n) setten sẏne sekelen an andir luͦde / korn wedder eren willen Ok scal dye priͤster dy alsus belegen wert reden vnd(e) louen vns vnd(e) dem rade alle disse / vor schreuen stuͦcke vnd(e) eẏn yowelk bye suͦndir stede vnd(e) gancz tuͦ halden an allen hẏnder vnd(e) wuͦr dar brok ane / worde so scolde wye vnd(e) dye rat mit en andir vnser eẏn dem ande(re)n dar truͦweliken tuͦ behulpen sin dat dat alzo halden / worde alze hyͤr vor ghe schreuen steẏt Tuͦ opentliker orkuͦnt vnd(e) groter wissenheẏt alle disser vor ghe schreuen / stuͦcke vnd(e) artikel ghe meynliken vnd(e) eẏn ẏowelk bye suͦndir stede vast vnd(e) ewich tuͦ halden So hebbe wye vnses / closteres openbar ẏnghesegel gehenget laten an dissen breẏf dye gheuen is na godes bort dretteẏnhuͦndirt Jar Jn / dem vyͤr vnd(e) achtigesten Jare Jn sente Gregorius daghe des hylgen paweses vnd(e) bichtigers