Jn ghoddes namen Amen . We her hans Prouest . Gherdrud ebdische Priorẏnne . kelnery(n)ne . vnd(e) de samnu(n)ghe / ghe meẏne des g(ra)uen closters tuͦ vnser vruͦwen Buten der muͦren tuͦ Ascher[s]le(uen) Beke(n)nen openbar indisme jeghen=/werdeghen breue Allen den de on sen edder horen lesen . dat we durch ghod vnd(e) durch su(n)derliker fru(n)tschap will(e)n / vnd(e) truwer beẏde der vorsichteghen wisen lude des rades jn der stad tuͦ Aschersle(uen) hebb(e)n erlouet vnd(e) vnsen ghuden / willen one ghegheue(n) . Dat sie buͦwet hebb(e)n vnd(e) buͦwen Eẏn altar jn der pharkerken tuͦ sante Steffene . de dar ghe-/wighet is jn de Ere der heren hilghen . sente mertens . sente Ciriacus . vnd(e) sante valentin . Sante Elẏzabeth . vnd(e) / Sante appolonie . Den sie Gewedmet hebb(e)n met ses B(ra)ndebuͦrche m(a)rk gheldes . Dissen altar hebben disse vorgn(an)ten / lude von deme rade vns tuͦ ghelecht durch sunderliker ghuͦnste willen tuͦ lighene met sulkeme vnder scheide / dat we edder vnse nakomelinghe den altar lighen scholl(e)n an allerleghe weddersprake vnd(e) vortoch . alse dicke / alse des nod is vor wen de Buͦrcher Mester vnd(e) rad disser vor ghen(an)ten stad Eẏndrechtelken bidden . Disse misse / tuͦ deme altare schal de Erste misse wesen fruͦ vnd(e) de preister de dar met belenet is schal sie halden alle daghe / an allerleghe jnval su(n)der liues nod . Ok en schal hei nemande bidden disse missen tuͦ haldene die plichtech / missen is tuͦ haldene in disser pharre dar meẏde sin misse ghehindert wuͦrde . die de missen vor om helde . vnd(e) / disse missen schal man also halden dat sie der pharre nicht schedlik en sẏ . vnd(e) wat ghe opphert wirt dar / dat schal heẏ antwerden vnseme proueste . Ok schal disse prester vnseme proueste vnd(e) vnser pharre sin tu den=/ste , durch ghod jn allen daghen wan man pleghet tuͦ ghande herlẏke processien wan vnse prouest suluen / mede gheit . En ginghe ok de prouest nicht mede vnd(e) be neme ome dat nod glike wol scholde doch de prester / mede ghan . Ok so schal disse prester nicht eẏne almose neẏmen Et en sẏ von su(n)derliker ghuͦnste vnses pro/uestes edder vnser vrowen . Ok so schal he neẏnerleghe selgherede edder testament von nemede nemen / Et en sẏ denne dat vnse prouest vnd(e) vnse Cappelane erst sin af ghe deẏlet . Dar na so erloue we ome / tuͦ nemene capplans diel vnd(e) dar en bouen nicht . Ok mer dat sek de prester an vnser pharre rechte an nichte / vorgrẏppe noch siek late tuͦ dissen vor screue(n) stuͦcken . wan we dat van ome eschen dat schal he be weren med / sime eẏde . dat he sek hir an bewaret hebbe wanne dat en schal nement setten sẏne seckelen an ander / lude korn wedder sinen willen . Ok schal de prester de alsus beleghen wert reẏden vnd(e) louen vns vnde deme / rade alle disse vor schreuen stucke stede vnd(e) gantz tuͦ haldene an allen hinder Tu orkunde vnd(e) tu eẏner / steden vestenu(n)ghe alle disser vor schreue(n) stuͦcke vnd(e) article ghe menleken vnd(e) en iowelk besunder / stede vast vnd(e) ewich tuͦ haldene so hebbe we vnses closters oppenbar jngheseghel henghet laten an / Dissen bref . De gheuen is . Na ghoddes bort . dretteghen Hu(n)dert Jar . Jn deme ver vnd(e) Achtesteghe(n) / Jare . Jn sante marcus daghe des hilghen Ewangelisten