Jk hinrik vn(de) Gorius min bruͦdir gehetin Gogreue bekennen opinbar indissim breue alle den de on sen / edir horin lesin dat alle oploͤufte vn(de) twydracht de gewest sin twisschin den Erbarn luͤden dem Rade / Meynemesterin Jnni(n)ghemesterin vn(de) den burg(eren) gemenlekin tuͦ Asschirsleue vn(de) vns is ghenzilkin bericht(et) / vn(de) hin ghe leyt in dissir wise alse hir na beschreuen steẏt Dat ik vornante hinrik vn(de) Goͤrius met guͤdim / willin vorkesin vn(de) vortygin allis schadin de vns gheschin is also dat we dissin vorschreuen Rat meyne / mestere iningh mestere we de sin nv edir hir na vn(de) de burg(ere) gemenlekin vn(de) jowelkin bysundirn in dissir / vornant(en) Stat vm disse schicht nicht vor dengkin scholin noch wrekin met wuͤrdin noch met werkin / met frundin noch met fromdin noch nemant von vnsir weghin de wile we leuen vn(de) we scholin / vn(de) willin orin fromen weruen vn(de) schadin warnen in allin stedin wur we kunnen vn(de) moghin / alle disse vorgheschreuen stuͤgke vn(de) eyn jowelk bysundirn loue we vornant(en) Hinrik vn(de) / Goͤrius dissim Erschreuen Rade meynheyt mester(en) Jnni(n)ghe mester(en) vn(de) den burg(eren) gemenlekin in / truwin met samdir hant in dissim breue an allirleyge argelist stede vn(de) vnuorbrokin tuͦ haldene vn(de) / hebbin dat gesworin tuͦ hilgin ghenzilkin tuͦ haldene vn(de) hebbin on des dissin bref dar op gheuen tuͦ / orkunt vn(de) wissinheẏt besegilt met vnsin ingesegelin vn(de) tuͦ merir wessinheyt so hebbe we on vnse na be/schreuene fruͤnt¹ tuͦ burgin sat vn(de) wanne der jennich af gheyt so schele we / on eynen andirn so ghuͦdin burghin settin in des stede de af geghan were dar na binnen den neystin / ver wekin alse we des gemanet werdin vn(de) de schal louen in sinem sundirlekin breue dar met / enschal disse bref nicht ghebrokin sin Vnde we Jan von dinghelstede herman Rantknouel von Hake/borne heyneman pepir hans von borne albr(e)cht von Tysne welrauen vn(de) ludolf von kneygindorp / knapin bekennen opinbar in dissim breue dat we alle disse vorgheschreuene stuͤgke vn(de) artycle / ghemenlekin vn(de) jewelk bysundir hebbin glouet vn(de) louen in dissim breue in truwin met samdir hant / stede vast vn(de) vnuorbrokin tuͦ haldene an allirleyge argelist vor dissin vornomdin hinr(ik) vn(de) Goͤriuse vnse / fruͤnde vn(de) met oͤn dissim vornant(en) Rade menheyt mesteren jnnighemester(en) vn(de) den burg(eren) ghe/menlekin dissir vorgheschreuenen stat Wiere auer dat disse erschreuene hinr(ik) vn(de) Goͤrius vm dissir / vorschreuenen stuͤgke jennich beschuldeghit wuͤrdin dat se de vorbrokin heddin wur se sek met orim / rechte ledegin willin dar schalme dat on tuͦlatin so scholin se der schulde vn(de) we von orir weghin / der schulde von on ledich vn(de) los sin Tuͦ opintlekir orkunt vn(de) wissinheyt hebbe we on dissin bref / dar op gheuen besegilt met vnsin ingesegelin angeheghit by der sakeweldig(er) ingesegele Na / ghoddis ghebort dretteyn hundirt jar jn dem neghin vn(de) achtingistin jare in sente matties auende / des hilghin apostelin