Vnsen ffrun(n)tliken dinst to vor(en) leue her heẏse ffuncken bysunde(re) gude frund vns heft / bericht de Erwedighe in god vader vnd(e) h(er)re her Rudeleff bisschopp to halb(e)r(stad) vnse gnedig(e) / h(er)re dat Thẏder(ik) peyne vnd(e) Geuerd schrẏue(re) mit gik gededinghet hebb(e)n . vm(m)e den / vnwillen den gi hebb(e)n mit dem Rade vnd(e) der stad to halbirstad vns(e)n fru(n)den jn disser / wise dat me gik vor iuwe koste arbeit vnd(e) schaden schulle gheue(n) veyr hundert Ryn/sche gulden twe hundert von stundan vnd(e) de ande(re)n twe hundert gulden schal me gik / gheue(n) bynne(n) jare vnd(e) daghe edder ey(n) leyn von vẏff lodighe m(a)rken edder vẏff / m(a)rk geldes to iuwem lyue . Ok vm(m)e hon vnd(e) seringe iuwes lẏues . dat schal stan / vppe den genan(ten) vns(en) gnedig(en) he(re)n vor halb(e)r(stad) vnd(e) vns vnd(e) vppe Tyderik(en) peẏnen / vnd(e) geuerde schryue(re) vorgena(n)t Ok so schal de Rat vnd(e) stad to halb(e)r(stad) . gik vnd(e) / juwem gesinde . vor iuwe lyff vnd(e) gud eẏne(n) frede vorwissen vnd(e) wu¹ gi den frede / von ene vor wissent neme(n) des seluen gelik schulle gi ene wedder don vnd(e) alle disse / vorschreue(ne) dedinghe schullen gik gehalden vnd(e) vulthoge(n) werden vp dem daghe alse / gi dar kome(n) werden an geferde . hir vm(m)e leue her heyse Bidde we gik mit flite / dat gi mit vns(e)n jege(n)werdig(en) vnses breues wise(re) willen kome(n) von stund to Qued/lingeb(o)r(ch) we willen gik geleyden vnd(e) veyligen vor allir malkem vt der stad to meẏ/deborch wente to Quedlingeb(o)r(ch) . vnd(e) wedder to meydeborch in . vnd(e) Reden vnd(e) loue(n) / gik disse vorschreue(nen) stucke stede vnd(e) gantz also vt to halden in diss(e)m breue an aller/leẏge argelist . vnd(e) hebb(e)n des to guder bekentnisse vnse jngesegele witlike(n) gedrucket / laten bynne(n) wendich in diss(em) breff Nach goddes bort vertey(n)hundert jar dar neist in / dem sesten jare am dinsedaghe na dem Sondaghe Reminisce