We Arnt . Eggert vnde hincze Stamer(er)n Gebrodere Bekennen openbar(e) vor vns vnde vnse erue(n) Jn dissem(e) vnsen / open breiue vor alle den de one seyn . horen edder lesen vnde vor allessweme dat we alle mit gudeme wolbedachten / moude eyndrechtliken recht vnde redeliken den Ersamen Borg(er)mest(er)n vnde Radmannen der Stad Asschersleue vnde / alle oren nakomeren . vorkofft vnde ok gantz to gruͮnde vorlaten hebben vnde ok in vnde mit krafft disses suluen / breiues vorkoͤpen . vnde ok gantz to grunde vorlaten vnse wert effte hoffstede buten deme greuͮen dore beneuͮe(n) / der Stad mure(n) vor der gna(n)ten Stad Asschersleue gelegen de lenge vnde de breyde mit alle oreme vm(m)befanghe / So alse de keuelere vnde vor anderlude mer de bewonet hebben mit aller gerechticheit So we vnde vnse erue(n) / dar ane wente her(e) to hebben gehat vnde in tho komenden tiden dar ane hebben moͤchten dar neynerleye buten / besloten wu men dat ok benemen mochte edder namen gewyn(n)en . vor Sesz vnde twintich schok gros/sch(e)n gemeyner¹ were alse genge vnde geue is de se vns an reydeme gelde na vnseme willen wol hebben vor/noyget vnde we forder(e) in vnse vnde vnser eruen nut vnde fromen gewant hebb(e)n . Des So schullen / vnde mogen de v(or)benomeden Borg(er)mestere vnde Radmanne der ergnan(n)te(n) Stad vnde alle ore nakomer(en) / Nu vnde in to komenden tiden jn vnde oppe sodann(en) benompden wort effte hoffstede na alle ores sulues / behage vnde orer Stad nutte veste vnde beteringe buwen Grauen Muren dyken vnde na alle ores / sulues behelicheit nu vnde in tho komenden tiden gebruken vnde behalden ane vnse vnde vnser eruen / weddersprake vnde ane geuerde Vnde we noch vnse eruen noch nymant van vnser noch vnser erue(n) / wegen enschulle(n) noch enwillen de vele gnante(n) Borg(er)mest(er) vnde Radmanne noch ore nakomer(en) nu noch / jn tho komenden tiden num(m)er mer(e) dar vm(m)e anlangen noch bededingen Sunder des ore vn(de) ore nako/mer(en) rechte were wesen vnde bliue(n) wur one des behouff worde ane allet geuerde des allet jn vor/geschreuener wise to orkunde vnde vn(de) forder(er) wissenheit . hebbe we obgnan(n)te(n) Arnd Eggert vnde hintze / Stamer(er)n den obgnan(n)te(n) Borg(er)mester(e)n vnde Radmanne(n) tho Asschersleue vn(de) alle oren nakomeren / dissen breiff vor vns vnde vnse eruen gegeue(n) besegilt mit vnsen , Arndes vnde Eggerdes Stamer(er)n / beyden angehengeden jngesegelen der(er) jngesegel beyde ek obgnan(n)te hincze Stamer(er)n vor mek vnde / myne erue(n) hir ane mede gebruke wente ek nu tor tid noch eygens nicht enhebbe Na cristi vnses leuen / hern gebort veirteynhundert jar(e) dar na in deme Sesse vnde vefftigesten jare Am(e) Sondage lletare in / der hilgh(e)n vasten