Ek hans slanstede Borg(er) to halberstad Mechtild myn elike husfrowe Hans kokes zeliger dochter bekennen / jn dussem vnsem open(en) brefe vor vns vnse eruen vnde vor alswem(e) dat de werdighe here Jordan heyne(n) / doctor deken der kerken vnser leue(n) frowen bynne(n) halb(e)r(stad) sodan(e) breff alse de Ersame Rad to Asschersleue / mek Mechtilde vnde myne(n) erfen gegheuen vnde dar jnne vor tweyhundert teyn gulden jarlikes tinszes / vorscriuen vnde vorsegeld hefft (et cetera) myd synem jnholde mid vnsem wetten vnde guden willen jnne hefft / vnde vns tweihundert gulden gensliken vornoget vnde gegheuen to gude(m) dancke so dat we vns vortighe(n) / vnde vorlaten ohme alle rechticheit des brefes so dat he schal vnde sine Testamentarien schullen vnde / moghen sijk der teyn gulden renthe vnde tinsze jarlikes bruken mane(n) upnehmen vnd jn ore nud / keren sunder vnse vnde vnser eruen hinder vnde wedder sprake willen vns dar entu[...]en ok nemant / van vnser wegen nicht mid geistlikem edder wertlikem rechte behelpen vnde he mach vnde schal den / den breff vnde de houet sum(m)en tweihundert gulden sijk vnde synen Testame(n)tarien to scriue(n) laten na / alle synen willen vnde bequemicheid des to merer bekantnisse hebbe ek hans Slanstede my(n) jnges(egel) / vor mek myne husfrowen vnde myne erfen witliken ghedrucket benedden up dat spaciu(m) dusses / brefes na der bord Cristi vns(es) her(e)n verteynhundert jn dem eynvndenege(n)tigesten jare Am daghe / philippi et iacobi ap(osto)lorum