WI van brandenborch vt d(er) nyen stat vn(de) ut d(er) alde(n) stat . Ratenow vn(de) Nawen . Spandow . Berlyn vn(de) Colne . Myddenwolde vn(de) Copenyc / Bernow . Euersuolde . Landesberghe vn(de) Struteberghe . Monekeberghe vn(de) Vorstewolde . Vranke(n)uorte Someruelde vn(de) Gobbyn . Besekow vn(de) / Luckow . Gorseke Belẏz vn(de) Bryten , Dye ratma(n) beke(n)ne(n) des in dessen gheghe(n)w(er)deghe(n) brẏwe . dat wẏe des ou(er) en hebben ghetraghe(n) vn(de) ghe/lovet . , we(re)t dat vses he(re)n hertoghe(n) rudolfes van sassen dar em got wor be war tuͦ kort worde . , er vse yu(n)ghe(n) he(re)n sẏne kẏnd(er)e mu(n)dych worden . , / so en scolde enghene stat eine ande(re)n hulde(n) tuͦ d(er) mu(n)tscaf . , wye en dede(n) dat met eyme ghemeyne(n) rade . , vn(de) berlẏn met den ande(re)n stede(n) dẏe user / va(n) bru(n)swẏc lẏf ghedy(n)ghe synt . , we(re)t dat vses he(re)n van sassen tu kort worde . dar us got vor be war . , so scolde(n) sye bẏe orer wrowe(n) dar sẏe / recht an dede(n) . , vn(de) scolde(n) dat du(n) na der stede rat . , Vort mer w(er)et dat e(n)nẏch h(er)e w(ere) . hẏe w(ere) wye hẏe w(ere) . dye tu de(n) lande toghe metter macht . vnde / wolde etleke stat af dedi(n)ghe(n) met so dan(er) rede . dat hye spreke also . , Alse ye yuͦwe(n) he(re)n va(n) sasse(n) ghehuldet hebbe(n) ofte e(n)nẏch h(er)e queme dẏe ẏuͦ / met rechte va(n) em brochte . / vn(de) em syne kost vn(de) sẏne(n) scade(n) de(n) hye uͦp yuͦ ghet(u)ghet hedde de(n) sye redelẏke(n) bewyse(n) muͦchte(n) . legherde . , Also ben ich hẏr / vn(de) wyl dat wl bre(n)ghe(n) . , od(er) enthleyge and(er) rede uor brechte dar hye yuͦ met ua(n) de(n) ande(re)n stede(n) wolde bry(n)ghe(n) . , so en scolde(n) sẏe enghe(n) dẏnc du(n) . sẏe / en dede(n) dat met d(er) benuͦmede stede rade . , Doch sẏnt stede vnd(er) desse benuͦmede stede dye vnse(n) he(re)n ua(n) sassen de(n) h(er)toghe(n) ghe huld(et) hebbe(n) tuͦ en(er) ewẏgh(er) huldy(n)ghe . , dat sẏn du(n) dar sye recht an du(n) . dar en wẏl wẏe sẏe nycht ane holde(n) . wẏe wẏlle(n) sẏe dar tuͦ worde(re)n . , Vort m(er) w(er)et dat e(n)nẏch / ma(n) mẏssedede an desser benuͦmede stede ennẏch . , dat w(ere) roue(n)de od(er) morde(n)de od(er) stelende od(er) berne(n)de up en lothe(n) . , deme scoldeme(n) wolghe(n) met rechte also / v(er)re we(n)te hẏe vor vestet worde . , so scoldeme(n) dye sake bescrẏue(n) dar hẏe v(m)me w(ere) vor vestet . , vn(de) scolde sye sende(n) va(n) stede tu stede so scolde(n) sye vor ues/tet syn in alle desse benumede stede . , vn(de) in welk(er) hẏe de(n) begrepe(n) worde dar scoldeme(n) lẏk(er) wẏz ou(er) em rychte(n) ofte hẏe yn d(er) stat begrepe(n) w(ere) / dar hye de(n) scade(n) hedde begha(n)ghe(n) . , Vort m(er) w(er)et dat e(n)nych desser benumede stede met eyn and(er) tuydracht hedde(n) . , dat scolde(n) sye vnd(er) sẏch / berychte(n) ofte sye muchte(n) . , w(er)et dat sye des nẏcht en ku(n)de(n) noch en muͦchte(n) . so scolde(n) sye dat ut(er) hant late(n) tu de(n) ande(re)n stede(n) . , vn(de) wat sye / de(n)ne vor en recht spreke(n) dar vmme dar scolen sye sych de(n) an late(n) ghenughe(n) . , w(er)et dat sẏe des nẏcht du(n) en wolden . so scolde vse h(er)e dẏe / h(er)toghe va(n) sassen dye wor benumede dar boue(n) en ou(er) ma(n) wese(n) . vn(de) war hye de(n) mette(n) ande(re)n stede(n) vor eyn recht spreke . dar scolde(n) sẏe sẏch / de(n) an late(n) ghenughe(n) . , Vort m(er) w(er)et dat ennẏch desser benumede stede ingheseghele an desse(n) brẏf nycht en queme . dẏe en scolde / nẏcht met dessen uor bescreue(n) sake(n) an stan . , Dat desse vor benuͦmede dync stede vn(de) vnuorwa(n)delet blẏue(n) . des hebbe wye . desse(n) ghe/ghe(n)worde(n)ghe(n) brẏf dar uͦp ghe gheue(n) met use(n) yngheseghele(n) beseghelet . , Desse dync dye synt gheschẏn na godes bort dusent iar vn(de) drẏhu(n)/dert yar . indeme ene(n)tuy(n)tẏgste(n) ẏare tu berlyn . an sunte bartholome(us) daghe des hẏlghen apostolus . , /