Jk Clawus valke von der Litzeniz Ritter . vnde ik Hans . vn(de) ik Erik Brude(re) . geheiten valken . Hern Clawuͦs / valken sone . wẏ vn(de) vnse Rechte eruen . Bekenne(n) allen samen . in dissen ieghenwordighen Briue . vor / allen vromen Luden . die en sin oder horen lesen . Dat die vromen Lude . die Raetmanne in beẏden / steden Berlin vn(de) Coln . hebben met vns ge redet vn(de) gesproken . vn(de) wy ¹ weder met en . vmme dat geleẏ/de . vn(de) vmme den Tol tuͦ sarmu(n)t . Also . dat nach irer anwisuͦnghe . alse si vns vnderwiset vn(de) an/gerichtet hebben . vn(de) ok . alse wẏ vns iruraghet hebb(e)n . von altseten wisen beruen Luͦden . vn(de) von / Rechter anwisunghen irkenne(n) konen . So sin si . vn(de) alle ire besetene Borge(re) tu Berlin vn(de) tu Coln / alghemeyne . armen vn(de) Riken . Die nuͦ sin . vn(de) noch tu komende sin . von Rechte . vn(de) nach alder wonheit / nicht meer plichtich tu geuen von tolles wegh(e)n . von geleydes wegh(e)n . vn(de) von vngeldes wegh(e)n . tu / sarmu(n)t . wanne si dar tu varen . met iren guͦde . wan slichtes io van den waghen . eynen Dam pe(n)nẏgh / alleyne vn(de) dar . boue(n) nichtes meer . vnde vppe dat . dat si vngeerret blẏuen mogh(e)n vn(de) sullen ewich/like . bi der vorsproken Rechticheit . als si . die von alder gehat hebben . vn(de) dar an nicht gekrenket / nochte gehyndert . nochte dar bouen besueret werden von ymande . nochte von vns . nochte von vn/sen eruen . nochte von vns(en) nakomelinghen . so hebbe wy met beraden muͦde . en . dissen ieghe(n)wordi/gen vns(en) opene brief . dar vp ge geue(n) . tu eyner ewigh(e)n stedicheit disser vorgenante(n) Rechticheit / vnde hebben tu tuͦghe vns(e) ingesegeln laten dar an hangh(e)n . Ge geue(n) tu berlin . na godes Bort drit/teinhundert iar . dar na in den vier vn(de) sestigesten iare . an vnser vrowen daghe Lichtwẏuͦnghe . /