Ich . alde thilo Brugge . Richt(er) . vnd(e) schulte tuͦ . Berlin . Bekenne openlich . in dessen . briue . vor allen / guden . luden die on sehen . odir . horen lesen . Dat . die Erliche(n) . vnd(e) . bescheiden . lude . die .. Ratma(n)=/ne von Berlin vnd(e) Coln . vmme . alle sake(n) . stucken . gebreke . vnd(e) sunderlich(e)n . vmme alle manu(n)ge / die ich yegen en hadde odir hebb(e)n muͦchte . von engerleige schelinge wegen , sich . mit eyn ander vpp / deme Rathuse . bie der nyge(n) Brugge(n) . gutlich(e)n . vulkomelich(e)n . vnd(e) gontzlich(e)n . mi nach guͤden / genuͦge . affgelecht , vnd(e) mit wille(n) . wol tuͦ dancke entrichtet hebb(e)n . Hirvmme mit wolbedachten / muͦde , vnd(e) mit recht(er)witschaft . late ich sie vnd(e) ere nakomelinge . in deme Rade . aller stucke . aller / saken . aller manu(n)ghe . vnd(e) alles geschefftes . wo ich dat mit welker ansprake yegen sie . hadde odir / hebb(e)n muchte . mit eynander . gesundert . odir wo . dat tuͦ nuͦmende . were . ledig . fri . qwit . vnd(e) los . / vnd(e) wil . sie . noch myne . Erue(n) . nim(m)ermer . in nynerleige wis . dar vmme mer mane(n) . Sunder / sie sulle(n) von vns . dar vmme gentzlich . vnd(e) ewilich . ane manu(n)ghe . bliuen . ane allerleie hulprede / vnd(e) argelist . Tu orku(n)de hebbe ich . myn . insigil . an dessen briff . late(n) . henge(n) Die geue(n) is nach . / Go(d)ds gebord Drutteinhu(n)d(er)t iar , Dar na in deme . vier vnd(e) souentigeste(n) jare . des negeste(n) vrida=/ges . vor . den . pingesten . /