Jk Fredderik van wustrowe Bekenne Openba(r)e Jn desseme Breue vor alle den de / en seen edder horen dat ik mit wlbord mẏner vedde(re)n Gherdes vn(de) albrechtes / hebbe ghe leghen . vnde lẏge an Rechteme leenguͦde den beschedenen wẏsen luͦden / Conen Brewẏssen . vnde Claws gotschalke . deme Elde(re)n Borghe(re)n to soltwedele / mẏt ener sameden hant . vnde eren Rechten eruen . den ersten hof , de dar licht / in deme dorpe to kallene also men kumpt van Soltwedele to der luͦchte(re)n hand / mẏt allerleẏe Bẏnnen tuͦnes vn(de) in watere in wateres vlete in velde in holte / in weẏde in wẏsche(n) an ackere gheploghet vnde vngheploghet vnde mẏt / aller nuͦd to deme houe ho(r)ende is ewichlẏken to Besittende sunder hinder vn(de) / ienegher ansprake hir ouer is ghewesen de duͦchteghe knape ẏwen van deme / knẏsbeke . vnde de wẏse man hermen van sannẏn . vnde Gher(de) pertze . vnde vele / meer guͦder luͦde den wol to louende steẏt . To ener grotte(re)n bekantnisse so hebbe ik / fredde(r)ik mẏt mẏne(n) vedde(re)n Gherde vnde albrechte vor ghenuͦmet vse Jngheseghele / witlẏken laten hengen an dessen bref . de ghegheuen vnd schreue(n) is Na godes Bord / dritteẏn hundert jar dar na in deme soue(n) vnde soue(n)tegesten Ja(r)e Jn sunte Nicola(wes) daghe / des hilghen Bẏschopes . /