Wj Ratmanne olde vnd nẏe der Stede Berlyn vnde Colne Bekennen in dessem open briefe / vor allen die en syen adir horen lesen , dat wi deme Erwerdighen vader in gode hern dyderik / Bisschoppe tu Brandenborg vnd allen sinen nakomelinghen , vnd deme Capittele tu Branden/borg , dorg gunst , wille , vnd forderunghe die syͤ vns in tukomenden tijden duͤn moͤgen , vnd / werden , vnd der wi vns tu allen tijden tu en vorsyen frẏheit gegeuen hebb(e)n an oreme huse / vnd houe iegen vns(er) vruͦwen kerkhoff vnd kercke(n) in der Stad tu Berlyn dar nuͦ her wilke we/deghe yne wonet , an schote , vnd an waken , vor der stad doͤr tusittende , vnd ane allerleie ander / burschaft vnd gerechticheit der stede ane mort vnd hantheftighe daet , vnd wiͤ in deme huse / vnd houe wonet den wille wi vordedinghen gelike vnsen andern boͤrgern , vnd vortmer so / scholen die vorbenuͤmden Bisschop , sẏne nakomelinghe , vnd Capittel dat huͤs eyme andern / nicht vorgeuͦen noch vorkopen , Gescheget auer dat sie dat selue huͤs vorgeuen adir vorkoͤften / so solen die stede alle oͤre gerechticheit an deme huse weddir hebben na als vor , sunder allerleie / hinder vnd gebreke Tu orkunde vnd tu tuͤghe hebbe wi vns(er) stede Jngesegele an dessen brieff / ge hanghen , die geuen is tuͦ Berlyn nach Cristi gebort dritteinhundert jar dar na in deme / dryͤ vnd achtigsten Jare an sente Sixti dage des hilighen mertelers vnd pawes /