Ekard maler wart vm(m)e / sodane saken vnthouet / als sy stan beschreuen / Irste sake he dref mang(er)leye / gewalt vn(de) selfrecht i(n) der stad / vnd fruchte dar an nicht den / Rad dat gerichte noch yma(n)de / he sluͦch vn(de) warp met steyne(n) / hans maler syne(n) meyster / dat he lach in deme dode vnd / en achte des gerichtes klage / dar vm(m)e nicht we(n) he en i(n) / deme houede kemplike vu(n)de / hadde geslagen . vn(de) dat dede / he dicke dat he meng(er)leyge / vpstat hadde met syne(n) meyst(er) / dat id den Radman(n)en sere / vor droͤt Ander sake was dat / wes dy Radman(n)e lite(n) vor bide(n) / an dobbelen vnd an voschen / spel i(n) der stad vnd in der stad / kelre dat gebod brak erat is / tu irsten vnd hild daran der / stad gebod nicht Dridde sake / met weme he spelede dy wile / he wan di musten em betalen / vorlos he so gaf he di vlucht / dar von vele vpstotes qua(m) / an worde(n) vn(de) an werken vnd / sunder stunden met klaghen / dar he vele muͦge den Rad an / dede vnd deme gerichte Virde / sake dat Erad in den kelre hadde / gemaket sodane twidracht by / nachte dat vele messer worden / getoge(n) von den borge(re)n vnd / wolden sich vnderlank slan // dar queme(n) der stad knechte tu / tu mate(n) vnd stuͦrden dy borgere / des morge(n)s was mere dat erad / dat hadde met syne(n) spele tu bracht / also do qua(m) klage ouer Erad / do hite(n) dy Radman(n)e Erarde g(re)pe(n) / den knechte(n) vn(de) solden en bri(n)gen / i(n) der stad gemak vnde behold / do dy knechte bi erande queme(n) / vn(de) wolden en gripe(n) do entlip / he em i(n) der here(n) hof vnd schald / der stad knechte vnd wolde sye / schiten vt deme houe vnd veyde / sy vnd sprak he wolde em dat af / neme(n) war he sy ou(er) queme / Vefte sake scholde he kome(n) vt deme / houe syn vedder di molemeyst(er) / qua(m) vnd dedingede en dar von / dat di Radman(n)e dat ou(er)seghen / vn(de) beden den selue(n) molemeystere / dat he Erarde solde berichte(n) dat he / sich lite nuͦge(n) an like vn(de) an rechte / vnd were gerwede do meynde / di selue molemeyster he wolde / en dar an vnderwisen dat he mer / wol scholde don , so he en strafede / don wolde erad den molemeister / slan vnd en gemordet hebben / vm(m)e di strafunge den ouerlop / klagede di molemeist(er) de(n) Radm(annen) / sere vn(de) sprak ich vuͤle wol dat / gi vele gewaldes von em liden / Seste sake he dref dar na nicht / lank met hans maler in den / kelre syne(n) ou(er)muͦt vnd met / mer luden dat he an em begink / selfrecht don wart he in den / Torn gelecht vn(de) wart von borg(e)n / vt geborget twige na de(n) ander / alse he [...] vt qua(m) so dede / he in den kelre vnstuͦr dat syne / borgen queme(n) vn(de) stellede(n) weder / in u(m)me di gewalt dy he dref / Tu deme leste(n) hadde he di borg(er) / met borgetucht sere gemuͦget / dat mer nymand wolde vor / em loue(n) do muste he dat selue(n) / met syme halse vor panden /