Jk Gherd van wustrow ffrederikes sone van wustrow Bekenne vnde be/tughe openbare Jn dessem bryue vor allen luͮden de en seen . horen . efte / lesen . Dat ik myt wolbedachte(n) muͦde . rade . vnde witschop . vnde myt vuͦl/borde mynes vedderen Gherdes van wustrow . Albrechtes sone vnde alle / vser erue(n) . hebbe gheleghen vnde lẏgen myt craft desses bryues Jeghe(n) [...] / duchliken rechtliken vnde redeliken to enem(e) rechten erfflene . alse lenes / recht ys Cu(n)rad(e)n Thyder[...] albert [...] chuzen gheheten de Breweken . / bruͦdere . Tyle brewitze(n) sone ichteswa(n) borghere to soltwedele deme Got / gnedich sy vnde eren rechten leen erue(n) . Twe vnde dryttich schepel rogghen / jarliker rente . Jn dem jrsten houe . de dar licht jn deme dorpe to kreme / also me ku(m)met van soltwedele to der luchteren hant . myt allerleye rechte / bynne(n) tuͦnes vnde in watere jn waters vlote jn veelde jn holte jn weyden . / jn wysschen . an acker ghe plughet vnd(e) vngheplughet . vnde myt aller nuͦt / de to deme houe hore(n)de is ewichliken to besittende suͦnder hinder vnde jen/nigherleye ansprake . Hir an vnde ouer sint ghewesen to tughe de erliken / lude Bernd dorheyde . hans buk . Claws van sa(n)nem . ha(n)s mu(n)ter hinrik dor/heyde . he(n)ny(n)gh wopelde . vnd(e) jacob arnsberghe . borghe(re) to soltwedele . vnde / ander erliker lude meer . de des gheloue(n) wol werdich synt To merer beka(n)t/nisse vnde groter bewysingh alle desser vorscreue(n) stucke . hebbe wy Gherde / frede(r)ikes sone . vnde Gherd albrechtes sone vorghenomet van wustrow / vnse jngheseghel witlike(n) henghen laten an dessen bryff Gheue(n) na godes / bort virteynhu(n)dert Jar dar na jn deme achteynden jare . Des dunrerdaghes / vor [su(n)te] Marien Magdalenen daghe . Der hilghen vrouwen . /