Wy Borgermestere Ratmann(en) Vierwercke Innigesmestere vnd gantze gemeinheit Aller vnd iglicher gemeynen borgere Arm vnd Ryke der Stede Berlin vnd Collen In der Marcke to Brandenborch an der Sprewe / belegen . Bekennen vor vns allen vnd vor alle vnse Eruen vnd nakomen , dy hirnachmals to ewigen tyden , In dy benante beide Stede Berlin vnd Cölen komen vnd wonhaftich syn werden / Openbar in dissem / vnnsem briefe So alse wy in des Irleuchten hochgebornen fursten vnd h(e)ren fredericks Margg(ra)ffen to Branndborch des hilligen Romischen Ricks Ertzkamrer vnd Borgg(ra)ff to Noͤremberg vnses gnedigen liuen / her(re)n vngnade komen syn von etliker vnd manthfeldiger Schulde to spraͤke an clage vnd sake wegen dy syne gnade gegen vns hadde vnd meynde to hebben wat des disuluen stede In sunderheit anlanget der aller / hir Inn nicht nod is touertellend So hebben vns doch des gn(an)ten vnsers gnedigen h(er)ren Heren Rede Manne vnd etlike von syner gnaden Steden gegen synen gnaden met flyte verbeden Dy saken met synen gnaden / In dedinge gebracht des wy on gutliken dancken vnd sy hebben sik so lange van vnser wegen daran versucht vnd twuschen dem gnant(en) vnsem gnedigen her(re)n vnd vns bered vnde bededinget alse hyrna geschreuen / steit . So dat wy obgnanten Borgermeistere Ratmann . Vyrwercke Innegesmestere vnd gantze gemeinheit der benanten beider Stede vor vns vnde vor alle vnsere Eruen vnd Nakomen to ewygen tyden In den benant(en) / beyden steden . Berlin vnd Cölen wanhaftich werden , dem gn(an)ten vnsem gnedigen hern Margg(ra)ffen fredericken vnd vnsem gnedigen h(er)ren Margg(ra)ffen fredericken dem Iungesten siner gnaden brudere allen oͤren Eruen / vnd Nakomen Margg(ra)ffen to Branndborch met groter eyndracht met gudem rade met bewuͤst vnde guden willen aller Inwonere der benanten beider stede Gegonnet erlouet togelaten vnd vnsen guden willen / dar to gegeuen hebben , Dat dy gnanten vnse gnedigen h(er)ren ore Eruen vnd Nakomen Margg(ra)ffen to Branndborg In der gnanten Stat Cölen by dem Closter prediger Ordens Buwen sollen vnd moͤgen / wes oren gnaden oren Eruen vnd nakomen Margg(ra)ffen to Branndborg dar eüen vnde beqweme sẏn wert Met namen lütter vt gedruͤgkt von dem Clostere prediger ordens den ordt von der Closter porten / Na der langen Bruggen wente an dy Sprewe langes neder wente an dy Stat muͤre wes In dem orde vnd wÿnckele begrepen is . Vnde dar to den werder dy an dem orde ouer dy Stat muͤre vnde / ouer dy grauen wente an dy Sprewe lÿt , Dar to dy Stat müre von dy Stat müre von der Sprewe wente gegen dat Closter . vnd dy Closter müre lenges wente an dy Stat müre Met toͤrmen wighuͤsern vnde grauen . Alse / wes dy gn(an)ten vnse gnedigen h(er)ren orer gnaden Eruen vnd Nakomen Margg(ra)ffen to Brannd(en)borg , vpp den benanten steden met doren Müren vnd Brüggen hindene vnd vorne aff vnd vth wo on dat / beqweme sin wert buwen willen , Des scholen sy ganzen vnd fuͤllen gewalt vnd macht hebben vnd ewiglichen beholden Vngehindert vor vns allen vnd ok vor allen vnsen Eruen vnd Nakomen ane arch vnde / ane alle geuerde , Ok hebben wy met der suluen eyndracht vnd met guden willen den obgn(an)ten vnsen gnedigen h(er)ren oren Eruen vnd Nakomen Margg(ra)ffen to Branndborg dat Rathusz twuschen den genanten / beiden steden vpp der sprewe . Vnd dy ouersten vnd nedersten gerichten In den gnanten oren beiden steden Berlin vnd Cölen Vnde dar to dy Nederlage vnde wes to densuluen ouersten vnd Nedersten gerichte / vnd to der Nederlage wente her to gehort hett wedder gegeuen Vnde geuen on dat alles williglichen wedder In crafft vnd macht disses briefes to hebbene to beholdene vnd to gebruken Na orem Nuͤt vnd framen / Richtere to settene vnd to entsettene Na orem vnd Na orer Eruen vnd Nakomen willen wo on dat beqweme sy Alse dat alles ok vor by der herschapp der Margg(ra)ffschapp to Branndborch gewest is Doch met sulkem / vnderscheide dat wy vnd vnse Ingesetene Medeborgere ore koupmanschapp vnd gud , nicht vernederlagen doͤrffen Ok schal nymant von vns allen noch von vnsen Nakomen vnser herschapp to schaden an der / Nederlage kein fromde gud verdedingen . dede dat ymant darbouen dy schal dat don vpp sine eüenthüre , Ok is wol witlik vnd openbar dat wy vns alle eyndrechtliken gegen den gn(an)ten vnsen gnedigen h(er)ren oren / Eruen vnd nakomen Margg(ra)ffen to Branndborch verplichtet verschreuen vnd versegelt hebben , wu vnd in welkermate wy vns met dem Rade vnde der Ordenung des Rades in den benanten beiden steden Berlin vnde / Cölen gegen den gn(an)ten vnsen gnedigen h(er)ren vnd [oren] Eruen vnd nakomen holden scholen . Vnde wes disuluen vnse briefe dy wy vnsen gn(an)ten gnedigen h(er)ren oren Eruen vnd Nakomen Margg(ra)ffen to Brandborg / gegeuen hebben forder Innehalden vnd vtwisen. Dy suluen briefe Confirmiren vnd bestedigen wy den gn(an)ten vnsen gnedigen h(er)ren oren eruen vnd nakomen Margg(ra)ffen to Branndborg met dissem gegenwerdigen / brieffe to holdene ane wedersproke ane arch vnd ane alle geuerde . Vnd sunderliken hebben wy obgn(an)ten Borgermestere Ratmann(en) vierwercke Innegesmestere vnd gancze gemeinheit der benanten beyder stede Berlin / vnd Colen vor vns vnd vor alle vnse Eruen vnd Nakomen den gn(an)ten vnsen gnedigen h(er)ren oren Eruen vnd Nakomen Margg(ra)ffen to Brandborg geredt vnd gelouet Reden vnd gelouͦen on met dissem briefe Sy an den / bouen geschreuen stucken met namen , an dem gebuwe an dem gerichte , an der Nederlage an dem hüsze vpp der Sprewe(n) , noch an keinen der bouengeschreuen saken nicht to erren Suͮndern dat alles . den gn(an)ten / vnsen gnedigen h(er)ren oren Eruen vnd Nakomen Margg(ra)ffen to Branndborg vngehindert beholden vnd besitten laten Na orer gnaden willen Nut vnd framen . Vnd wy scholen noch enwillen ok Nu henforder / mehr weder dy gn(an)ten vnse gnedigen h(er)ren ore Eruen vnd Nakomen Margg(ra)ffen to Branndborg ny(m)mer mehr doͤn Sundern to ewigen tÿden ore orer Eruen vnd der herschapp des Margg(ra)ffdoms to Branndborch willige / vnderdenige vnd gehorsame borgere vnd vndersaten sin , vnd bliuen ane hulpprede ane arch vnd ane alle geuerde . Vnde dar vpp hebben vns dy gn(an)ten vnse gnedigen h(er)ren den Tempelhoff met allen dorppern / vnde güdern gnedeclich ver eygent Alse wy den von dem orden Sente Johanns gekofft hebben vndhebben vns orer gnaden bestediges brieff darouer gegeuen dy dat clerliken Inneholt vnde vt wiset , doch / Also dat dy gnanten vnnse gnedigen h(er)ren ore Eruen vnd Nakomen , ore Roszdinste . wagendinste , legere , heerwegene lantbeden , vnd alle andere der herschopp gerechticheide dar vpp hebben vnd beholden schoͤlen / Alse sy vnd dy herschapp by des ordens tÿden dar vppe gehatt vnde Nu noch in geweren hebben ane allermeniglichs wedersproke vnd ane alle geuerde . Alle disse vorgeschreuen stucke . puͮnckte vnd artickele / vnd eyn ywelik besunder wat vor vns , vnsen eruen vnd Nakomen In dissen briefe geschreuen steit , Reden vnd louen wy ergnant Borgermeister , Ratmann , vierwercke Innegesmester vnd gantze gemeinheit / der benanten stede Berlin vnd Colen vor vns vnse Eruen vnd vor alle vnse nakomen , den gnant(en) vnsen gnedigen h(er)ren Margg(ra)ffen friderichen dem Edelsten vnd Margg(ra)ffen fredericke dem Iungesten siner gnaden / brüdere oren Eruen vnd Nakomen Margg(ra)ffen to Brandborg in guden truwen stede vaste vnd vnuerbroken ewichliken to holden vnd nicht touerbreken ane hulperede ane argelist vnd ane alle geuerde . Hyrby / vnd ouer syn gewesen , vnd disse bouengeschreuen saken hebben helppen handeln vnd dedingen Dy wolgeborne werdigen Edeln , Gestrengen Erbarn vnd Ersamen , vnse gnedigen vnd gunstigen liuen h(er)ren vnde / frunde , h(er)re Albrecht Greue von lyndow vnd h(er)re to Reppin , h(er)re Johanns Abt to lehnyn , h(er)re Thobias Abt to Corin , h(er)r hanns von Torgaw h(er)re to der Czossen . h(er)re hanns von waldow Ridder h(er)r hans von liech/tenstein Ridder , h(er)re francz Steger prouest to Berlin h(er)re hinrick Rotenborg Mattisz von Bredow dy olde Wilhelm vosz vnses gnedigen h(er)ren Marschalk . heintze kracht siner gnaden Canczler hans von Bredow heyne / puel Achim hake Arnd Crummensee Ebel von Arnym Geuerd schapelow Cune Barfud wilhelm von der lype alle vnser gn(an)ten gnedigen h(er)ren Rede vnd manne , Merten winsz henrick Rÿman vnde / fritze belkow Borgermeister vnd Ratmann(en) to franckenforde , Materne wardenberg Seuerin kÿn Jacopp vosz hanns moczeltin Jorge helmbrecht vnd Mattis hoenow Borgermester vnd Ratmann(en) to Spandow / Jacob Ringenwolde hans ÿden vnd Clawsz frysen von dem Rade to Bernow vnd vele meher gelouͮenwerdiger lude genuch . Des allen to waren Orkunde ok to merer sekerheit vnd Bekentnisz , hebben / wy obgnanten Borgermestere Ratmann(en) vnd vierwercke alle vor vns vnd vor dy Innungen ok vor dy gantzen gemeine vnd vor alle vnse Nakomen vnse Ingesegele , an dissen brieff hengen laten , der wÿ / von allen Innygen vnd der ganczen gemeÿne mede gebruͤken , dÿ Beschreuen vnd Gegeaen is Na godes geboͤrt , viertenhundert Iar vnd darna Im twey vnd vertigsten Jare Am Myddeweken Sente Johans dage / decollationis In der Stat to Berlin /