Ik Allebrecht van sandow vnde myn rechte erue beke(n)nen in dessene open briue vor alle lude , dẏ en sin horen odd(er) / lesen , dat ik verkope vnde verkoft hebbe , met willen vnde met vorgedachte(n) muͦde , vnde met vulbort myner / kynde(re) , Ebel klenesadel , vnde sẏne(n) rechte(n) erue , vnde peter malentzin vnde sẏne(n) rechte(n) erue , Tuͦ leyͤne vnde / tu erue , vnde elzebethen ebel clenesadels elẏken husvrouwe(n) , vnde Alheyͤden pet(er) malentzines elyghen husvrowe(n) / tu erer twẏer lẏfgedinghe , dat dorp tuͦ der w[e]ntgroben met aller to behoringhe met geholte , met graze vnd(e) / met acker vnde ses vnde druttich huͦnre vp twelf , vnde achteẏn scẏllink pe(n)ni(n)ghe B(ra)ndenborsgh(er) munte Jer-/liker pleghe , Vp sunte mertens daghe , vnde twelf , huͦnre vp vir huven van den vẏne(n) dy dar hore(n) tuͦ deme / schulte ambachte , met alle(m)me rechte , Alze mẏn vader mẏ dat vorghenante guͦt ge erfet heft , vnde ik dat / beseten hebbe ruwelike synt mẏnes vader dode Sunder allerleyͤe an sprake , Ane vif hune(n) buten besceͤyden / dy dar horen tuͦ deme sculte ambachte , vnde gan tu lene van allebrechte van den werder , vnde sunder , dẏ / molne dẏ dar lẏt in der vor benumden marke tu der , wentgrobene , Ok lye ik vorghena(n)te albrecht van . / sando . vnde hebbe gelege(n) met willen vnd(e) vorghedachte(n) mude , vnd(e) met vulbrot mẏner kẏnder dat / vor ghenante gut tu der wentgrobe(n)ne , den vorghenante(n)n Ebel klenesadel vnd(e) syne(n) rechte(n) erue(n) vnd(e) / pet(er) malentzine vnde syne(n) rechten erue(n) tu lene vnde tu erue , vnde Elzebeten ebel klenesadels elyke(n)n / husvrouwen vnd(e) Alheyden(e) pet(er) male(n)tzines elẏke(n) husvrouwen tu erer twẏer lẏfghedinge , Ok wen / got ouer mẏ genanten Albrechte van Sandow ge bydet dat ik sterue so scolen mẏne kẏnde(re) dat vor=/ghenante gut den vorbenumden , Ebel klenesadelle , vnd(e) pet(er) malentzine vnd(e) erer twyer rechte erue(n) / tu lene vnde tu erue , vnd(e) Elzebeten ebelklenesadels elike husvrowe , vnd(e) Alheyͤden pet(er) male(n)tzins elyke / husvrowe tu erer twẏer , lẏfgedinghe , lẏen sunder allerleyͤe gẏfft vnde gane , Des tu eyn(er) groter / bekentnisse hebbe ik vorgenante Albercht van sandow mẏn Jngesegel met witschap an dessen briff / gehange(n) dẏ ge geue(n) ẏs na godes bort dusent drẏhundert yar Jn deme ses vnd(e) negentigisten yare / an Sunte mathias auende dyͤs hilgen Apostels /