Jck Busse Schilt wonaftich to warschow . vnd(e) der dhomher(e)nn voget to Magdeborgh . Bekenne vor my myne rechte liues lehns eruen . vnnd sunst vor allerme(n)niglich . die dessen mynen apembriff sihn hor(e)nn odder lesen . dat ick mit wol‑/bedachten mode willen vnnd fulbordt myner rechten eruen . vnd mit guden ripen rade . vorkoft hebbe vnd(e) inkraft / desses briues Iegenwordich vorkope . den Ersamen peter rock vnnd Thomas Storbeken Meistere . vnnd den gantzen / gemeynen guldebruder(e)n des hilligen lich(n)ames gulde . der Niennstadt Brandemborgh vnnd alle(n) orhen nakomelinge(n) / einhalfschock rente Brande(m)borgescher weringe . alle jar(e) vp martini fallaftich . vp mynen hof vnd(e) hufen in vnd(e) / buten dem dorpe warchow gelegen . den itzundes einer gnant Achim foltzke in gebrukender were besittet vnd(e) / bedriuet . darvor wy die ergnant(e)n Guldemeistere hebben ouerantw(or)det vnnd tor(e) gnüge wol betalet sesz schock / grosch(e)n Brandemborgescher lantweringe . die ick in myn vnnd(e) myner rechten erfen . nuͤdt vnnd(e) fraͤm geke-/ret hebbe vnnd(e) segge ehm vnnd allen orhen nakomeli(n)gen des sesz schock quidt leddich vnnd(e) loͤsz inkraft dess(es) / briues . vnnd oft die gnante Achim voltzke odder alle die genne die den vorgnant(e)n hof vnnd(e) hufen / besitten vnnd in geruchliger gebrukender were hebb(e)n . in der betalinge der rente sumich gefunden worden / Mogen szy panden odder dorch orhe geschickten panden laten , so ofte dat nodt sihn worde , vnnd(e) so Idt ehm / behuͤf dede . wolde ick odder myne rechte eruen ehm darto behulpen sihn . doch hebbe ick my im kope / beholden . dat ick sodan halfschock rente mit sesz schock(e) Brande(m)borgescher weringe . mach wedder aue / kopen wen ick darto geschicket byn mit sulgen bescheyde . dat ick den gnant(e)n guldemeister(er)n odder orhen / nakomelinge(n) ein ferndel iares to vorne upsegge . vnnd denne up die bestymde afgesechte tiͤdt den houet-/stuͤl mit sampt aller vorseten rente(n) , oft dar noch wes vorseten were afgeue vnnd(e) betale sunder enni/gerleye hinderlist . bosebehelp vnnd geuerde . vnnd(e) ick Busse schilt mit mynen rechten liues lehnseruen / wil den gnant(e)n Guldemeister(e)n orher gemeyne(n) sa(m)melingen . vnnd(e) all orhen nakomelinge(n) . des kopes / ein recht gewer(e) sihnn To orkunde vnnd(e) warehr(e) bekentnisse hebbe ick Busse schilt vor my myne / rechte eruen myn Ingesegel benedden an dessen myne(n) apembriff mit guder witschop hangen laten / am sonnaue[n]de de vor oculj nha der gebordt cristj dusentvir(e)hundert darnha im dryvnd(e)negen=/tigsten Iarenn(e) /