Wir otte von der gnade goddes Erczebiscop des hilghen goddeshuses to magdebur[g] be kennen vn(de) betughen vffeligen in disseme / ghegenwordigeme briue . Daz wir mit willen , vn(de) mit volbort vnses Capitelles gemeyne haben gethedinget mit vnsen / liben truwen , den gerwern vn(de) mit schoworchen [?] , die wonhaft sin on vnser stat tzuͦ Borch , daz wir on habin gegeben / eyne Inunghe , die sollen se ewiclighe haben na ore wert sal [...] man oͤben in vnser vorghenanten stat her on habe die / Inunghe gewunen , Vn(de) wer die Inunghe ghewinne wil der sal gheben dri virdinghe , B(ra)ndenbursches silbers , des geldes sal / vns vn(de) vnsen nakomelinghen eyn virding vn(de) den brudern die vn(de) der Inunge sin eyn halb mark Her sal ouch geben vir / stuke vleysches die sollen sin eyne halben virdinges wert , daz soln die Inunghes bruͦdere vor toͤ na orer kompenie . wer ober / in der Inunghe is geborn vn(de) wir dar inne geborn . wenne der die Inunghe ghewunet , der sal ghebe eyn lot , da sal vns vn(de) / vnsen nakomelinghen der dritte phennig vone geualen , vn(de) czweyteil den Inunghes brudern , Were ouch daz in der Inunghe / iman icht valsches woͤrchte , an orme werke , daz moghen sie richte vnder sich selben [...] willekore sal sin fuͤnf schillinghe die / sal der gebe die daz valsch hat getan Dar vmme daz vir en halbin ghegebin die Inunghe , also da vor stet gescreben so habin sie vns / ghegebin driundetzwentzit mark B(ra)ndebursches silbers . Vn(de) czuͦ eynem orku(n)de der Inunghe so sollin die Inunges bruͦdere vns vn(de) / vnsen nakomelinghen , ewicklighen alle iar geben vf sente Marcus tag tzwey par Ste[...] vn(de) tzwey par schuͦ , vn(de) vf sente / walpurghe tag tzwey par steuile [?] vn(de) tzwey par schuͤ . Tzuͤ eyme orku(n)de der vorschrebenen dinghe , daz die ewichge stete vn(de) / vntzubrochen werden gehalden so habe wir dissen brif lazen besegelin mit vnseme Ingesegele . Vn(de) wir Heinrich von der gna/de goddes der Tumprobist vn(de) daz Capitel gemeyne dez vorgenanten goddishuses tzuͤ eyme orku(n)de daz vorgenante ding sin / geschen mit vnseme willen vn(de) mit vnser volbort so habe wir ouch vnses Capitels ingesegele an disse brif lazen gehanghen . / Disse brif is gh[e]gheben tzuͤ Meyborg nach goddis gebort . Tusen Jar Drihundert Jar , in deme achte undedrizigesten Jare / in sente Gregorius taghe des heyligen Babisses - /