Wie Petrus von der gnade goddes Prouest Barsilius Prior , vn(de) Petrus borlyng perrer / to Borch vn(de) dat Capittel ghemeyne de(s) Muͦnsters vnser vrowe to Meydeborch , beken(n)en vnde / betughen openbarlike(n) in desme ieghenw(ar)dighe(n) brieue , Dat wie mid wille(n) vn(de) vulbort vser aller / hebbe(n) vulbordet vn(de) ouer ghegheue(n) vn(de) vulborde(n) in Desme ieghe(n)w(ar)dighe(n) brieue , dat me / scal vnde mach bewedeme(n) vn(de) wyen , dat nye hus Inder stad to Borch In vser parre , dat / itteswen(n)e ghebuwet hebbe(n) Her Jan vnde her Jacob Betheke(n) preste(r) , an deme weghe by dem / Cerwiste(re)n dore to eyner Capelle(n) dar inne to hebbene vn(de) to donde goddes denst an missen / godde to eren vn(de) to eyneme loue , vn(de) allen loueghe(n) selen to eyneme troste Vnde ok so is / dat vse wille vn(de) vulborde(n) dat , dat die Ratman(n)e der stad to Borch scole(n) lẏen de vorbeno=/mede(n) Capelle(n) nu vn(de) hir na vn(de) alse dicke alse sie los wert , dat scolen sie don bẏ eẏner mane / thid vn(de) scole(n) sie lẏen eẏne(n) persone(n) die si priester , eder priester w(er)den moghe bẏ deme / selue(n) iare , vn(de) we(re) dat sie des nicht en dede(n) bẏ der vorbenomede(n) thid , so scal die perrer / die den(n)e in der thid is de vorbenomede(n) Capellen lẏen , vn(de) ok weme die Capelle gheleghe(n) / wert , vn(de) dar in(n)e ghewiset w(er)t , die scal deme perrer to Borch rede(n) , dat he eme wille / mid ghanczen truwe(n) antw(or)den sin opper vn(de) also dane pen(n)i(n)ge die eme w(er)de(n) ghegheuen / vor missen Thughe sint desser dinge Her Hen(n)i(n)g hidde perrer to sente Johan(n)es , Her Conrad / kracht Scolmeyster vnse h(er)ren , Her Busse(n) vo(n) Luderstorp vn(de) her Hen(n)i(n)g vo(n) Luderitz Ridde(re) / vn(de) ande(rer) bederuer lude noch , , To eyneme orkunde desser dinge so hebbe wie dessen / brief ghegheue(n) beseghelet mid vsen anhanghede(n) Ingheseghele Na goddes ghebort dusent / Jar driehund(er)t jar In deme veftigheste(n) Jare In sente Mertens auende des heẏlighen / Bẏsschopes /