In nomine domini . Amen . Wi . alde claus . hans vnde claus mine sone . Junghe claus hans sone . Wepenere van Grabow / ghenant . bekennen vnde bethugen in disseme openbaren briue . vnde dun witliken allen di den horen adir sin , dat wi mit / ghemeinen volge hebben vorkoft de bederuen pristeren vnde leyen di dar sint in deme kalande tu Borch rekliken / vnde redeliken Tuene winschepele Roggen di dar leggen vppe tuen huuen in deme velde tu Lebbekune di dar drift / Henrik di dar schulte is ghewesen tu Detershagen , vnde gift dar van anderhaluen winschepel Roggen . vnde sin sone hans / einen haluen winschepel . Disser tvier winschepele scholle wi ir ghewere sin vor iuwelker ansprake . Disse vorbenume/den tuene winschepele scholle wi lyen vier bruderen di dar sint in deme kalande tuen pristeren vnde tuen leyen di si / dar tu kysen . Stiruet der ein adir tuene so scholle wi vnde vse eruen anderen eime adir tuen in deme kalande disse / vorbeschreuenen tuene winschepele vort an lyen , ane mide dat is ane helling vnde ane scherf , vnde schollen ok dat / dun di wile dat en des noth is . Wi schollen ok disse vorbenumeden kalandes herren neneme herren noch nenem / manne mit disseme vorbenumeden korne wedir laten adir vor wisen . wi nen dun dat mit der vorbesprakenen ka/landes herren wille . Ok scholle wi vnde vse eruen di wile dat wi vnde si leuen di leen disser vorbeschreuenen / tuier winschepele den seluen kalandes herren tu gude vnde trueliken na halden . Hir vmme dat disse dink gantz / vn(de) stede bliue(n) so hebbe(n) wi dissen vorbenanten kalandes herren gegheuen vsen brief vnde hebben den beuestet mit vsen / Insegelen . vn(de) ik Junge claus hans sone laͦue mit mines vader vnde mit den anderen Insegelen . Disser vorbeschre/uenen dinge sint thughe vnde hebben dar by ghewesen . Her Johannes van w(o)lue di dar perrer is tu Mokern / helewich brandans Junghe otto van w(o)lue . Hans van Lyndow wepenere tu mok(er)n , vn(de) ok andere bederue lude . vnde is / disse bryf gegheuen . Nach godes ghebort dusunt Jar drihundert iar in deme negen vn(de) veftigesten iare in der midde/weke in den pingstheiligen daghen /