In nomine d(o)m(ini) . Amen . Wi alde claus . hans vn(de) claus mine sone . Junghe claus hans sone wepenere van Grabow ghenant / bekennen vn(de) bethugen in disseme openbaren briue . vn(de) dun witliken allen di den horen adir sin . dat wi mit vser gemeinen / volghe hebben vorkoft den bederuen pristern vn(de) leyen di dar sint in deme kalanda to Borch rekliken vn(de) redeliken tvu huuen / di dar leggen in der nyen marke tu Gladow mit eime erue in deme Nyendorpe tu Gladow mit allerleye rechte vn(de) gift Juwel-/ke huue einen haluen winschepel Roggen . Vn(de) ses schepele gersten . vn(de) ses schepele haueren . disse huue(n) di driuen Claus / hechte vn(de) hans Borbeke . Ok hebbe wi vor koft den selben heren twene vn(de) twintich schepele di dar liggen oͮppe vier huuen Roggen / in deme velde tu kenre ok mit allerleye rechte . Disser huue vn(de) disses kornes scholle wi ere gewere sin vor juwelker / ansprake Disse vorbenumeden huuen scholle wi lyen vier bruderen di dar sint in deme kalanda twen pristern vnde / twen leyen di si dar tu kysen . stiruet der ein adir twene so scholle wi vn(de) vse eruen anderen eime adir twen in deme ka/landa disse vorbeschreuenen huuen vort an lyen ane mide dat is ane helling vn(de) ane scherf vn(de) schollen ok dat du(n) / di wilen dat en des noth is . wi schollen ok disse vorbememeden kalandes heren neneme heren noch neneme manne / mit dissen vorbenumeden huuen wedir laten adir vor wisen wi nen dun dat mit der vorbespraken kalandes / heren wille . Ok scholle wi vn(de) vse eruen di wile dat wi vn(de) si leuen di leen disser vorbeschreuenen huuen den seluen / kalendas heren tu gude vn(de) trueliken nach halden . Hir vmme dat disse ding gantz vn(de) stede bliuen so hebbe wi disse / vorbenanden kalandes herren gegheuen vsen brief vn(de) hebbe(n) den beuestet mit vsen Insegelen . vn(de) ik Ju(n)ghe claus hans / sone loue mit mines vader vn(de) mit den anderen Insegelen Disser dink sint thughe vn(de) hebben dar bi gewesen her hen/rik di perrer van Drezele her Joh(anne)s smol capellan tu Grabow . vn(de) ok andere bederue lude . vn(de) is disse brief ghegeuen / noch godes gebort dusunt Jar drihundert Jar in deme ein vn(de) sestigesten Jare des nesten daghes nach sente Margare/ten daghe /