Wy burgermeistere vnnd Rathmanne der Stadt Borgh Bekennen Inn dusszenn apenbreüe vor vnnsz vnnd alle vnnsze nachkomelinge vor alle denn die ohn syhenn ader herenn / leszenn dat wü mÿt willenn vnnd fulborth der Jennen den dat billich tho steyth deme almechtigenn gode tho laüe der hemmelkonnigynnen Marienn vnnd allen heilighenn tho ere / heyll trost vnnd salicheyth aller gelobigenn vnnd vorgetenen szelen dÿ dar nicht meher hebben wen dat gemeine beth Gestifftet hebben eine Co(n)uiende Inn vnnszer liuͦenn / frowenn kerkenn tho Borgh vppe deme altar des heiligenn waren lichams des dinszendages eine missze vann vnnszer leuen frowen desz dunredages eine missze vann deme -/ heiligenn waren lichame vnnd eine sylemissze Inn der weke wen dy alder begnemest [?] durch denn co(n)uiendisten [?] geholden kan werden Dussze beide misszen alsze vann / vnnszer leuen frowen vnnd deme heiligen waren lichame schalen vnnd willen singen dÿ gelerden Borgere myt deme prestere Alszo dat dÿ vorgefaste vnnd vorgemelte / godes dinste sunderliken dÿ missze vppe sunte katerinen altare vnnd dÿ metten durch dussze stiftunge nicht vorbliuͦen Desz donredages szo schalen alle dÿ gelerden perszonen / aldhar kamen mit ohren lichten dÿ dar tho geschicket synth vnnd mit deme prestere vor dat werdige sacrament gan vnnd singen erliken wath vann deme priestere / angehoüen werth szo lange dat sÿ komen mit deme werdigen sacrament tho deme altare corporis cristi Dar nha schalen vnnd willen dÿ lerden perszonen anheüen vnnd / singen demodigen de missze corporis cristi Ock schalmen tho der sulfftigen [?] misszen myt der apostoliken erliken luͦden Ock schall dussze co(n)uiendiste singen dÿ missze vann / vnnszer liuͤen frowen Inn deme adüent cristi Tho den gnanten misszen vnnd Co(n)uenden schalen vnnd willen geuͤen dÿ vorstender vnnszer leuen frowen kerken deme / priestere alle Jar ohm souͤen rinsche gulden vnnd ein fuͤder holtes vnnd ein pünth wasszes Ock schall dÿ Co(n)uendiste macht hebben tho howen laten veher ader vÿf / fuder holtes Inn Borger holt Alle lerde perszonen dÿ dussze misszen helpen singen vnnd dÿ bruderschapp hebben Itzlick perszon schall geuen tho den vorgnanten misszen ein / punth wasszes vnnd den bruderen sosz olde groschen Ock schall men den sulftigen lerden perszonen dÿ dee misszen helpen singen vnnd nicht vth bliuen ene echte noedt wan sÿ / dodes wegen aue ghan tho orer bygraft lighen vnnd gelegen hebben gerne vorgeuͤes vnnd vnuorsecht lichte baldeken vnnd klocken vnnszer leuͤen frowen were ock erlick man / edder frowe de begerende were de bruderschap corporis cristi vmme gnade vnnd afflaten willen vnnd gude werke dÿ dar Inne scheen vnnd schen werden de meh helpen / singen dÿ missze corporis cristi dÿ schal geuen tho der missze vnnd bruderschap dree punth wasszes vnnd sosz olde groschen den sangk bruderen Ock schalmen all den leuen / szelen dÿ vth der bruderschap corporis cristi vorstoruͤen synth alle Iar singen eine vigilie vnnd selemissze de vigilie des auendes am dage der dedicarien des altares corporis cristi / vnnd de sulftige vigilien schal erliken singen dÿ Co(n)uiendista des altares corporis cristi mit twen capellan vnnd twen custeren dar schalen vnnd willen dÿ vorstender Itzliken / pristere geuen veher grote pennÿnge vnnd den custeren twe vnnd eine szelemissze vppe deme sulftigen altare corporis cristi des anderen dages nha des gnanten altares / dedicarien vnnd tho der suluigen szelemissze schall vnnd wyll ein Itzlick bruder vnnd suster Inn dy bruderschap corporis cristi den liuen szelen nha offeren einen laneliken pen(n)yngk / dat sulfte offertermin schal nhemen dy perner tho Borgh Ock schalen vnnd willen dÿ kerckmeistere tho den vorgedachten vnnd nachfolgenden misszen schicken mißghewant boke kelk / wyn hostien vnnd allent wesz dar noth vnnd behof tho ysz vnnd weßzen wert dar vor schalen dÿ kerckmeistere mergnant entfangen vnnd vpnhemen all dat gherunge grot vnnd / cleine dar tho der gnanten misszen vnnd bruderschap gegeuͦen wert ane alle argelist vnnd geuͦerde Wy borgemeistere vnnd Rathmanne tho Borgh vorgnant bekennen ock vor Idermenlich / den dussze stiftunge vorkommet dat dÿ Erenhaftigen vnnd Erszamen Ern Johannes arnold Nicolaus angeli Inn gedachter vnszer leuen frowen kerken tho Borgh Johannes wilken Claus / schermen vnnd hans henricus borgere vnszer stad Borgh alle testamentarien erwaz [?] desz Ernhaftigen Ern Jacobi kruggen [...] dar sye nha deme lesten willen vnnd Inholde des-/ses testamentis des sulfftigen deme almechtigen gade tho laue der hymelkoningynnen Marien vnnd allen heiligen tho ere heyl trost vnnd salicheydt des gnanten Ernn Jacobi / kniggen siner olderen susteren Bruderen alle synen woldederen vnnd allen gelouigen selen ock gestiftet hebben eine missze van der heiligen dryfaldicheyt Inn gedachter vnnszer leuen / frowen kerken vppe deme altar desz hiligen waren lich[names] mit willen vnnd fulborth der Jennen den dat tho steyth alszo dat dy vorgemelte Co[nuiendes] corporis cristi vnnd dussze missze / effte corriende [?] dorch den vorgemelten testamentarien gestiftet eyne corriende [?] schal syn vnnd bliuen vnnd de sulftige corriende begiftiget mit vif rinsche gulden Jerlicher tinsze bÿ denn / Erszamen vnnd wiszen Innigesmeister vnnd Inunge der wantsnider gulde Inn vnnszer stadt Borgh vppe einen wedderkop gekoft nha lude vnnd Inholde des kopes breues / dar auer gegeuͤen de renthe vppe philipii vnnd Jacobi tho betalen vnnd ein husz nehst bÿ der schülen nha der ylen ane alle borgerrecht vnnd vorplicht frye vnnd losz Dusszer szo do [...]der / vnnd begiftigeder co(n)uiende befelinge effte In [...] geuen dÿ vpgnanten testamentarien Burgemesiteren vnnd Rathmannen desz sittenden Rades vnnszer stadt Borgh Inn craft / dusszes breues Inn szodane wisze vnnd forme dat dussze co(n)uiende dorch vnnsz dÿ testamentarien vorgemelt gestiftet co(n)uiendiret vnnd befalen werde einen borgers szonen Inn vnnszer / Stadt Borgh de priester Isz ader binnen Jar wyl priester werden ock schal hee ein medebruder weszen desz kalandes vnnd by deme altare vnnd co(n)uiende corporis cristi personlich / resideren vnnd alle weken veher misszen holden de Irste desz sundages schal sin de trinitate De ander desz dinszendages vann vnnszer liuen frowen De drudde desz dunredages / de corpore cristi wu vorberurth vnnd liue selemissze Inn der weke wen sÿ alder bequemest durch den co(n)uiendisten geholden kan werden alszo de godes dinste vormals gestiftet / dorch dussze nicht vorbliuen vnnd vorhindert werden de missze de trinitate schal singen dy co(n)uiendista mit den custeren ader dorch einen anderen ane alle / vorszumenissze tho holden bestellen vnnd van den vif gulden schal de besitter der co(n)uiende eine memorien mit vigilien am dage trynitatis vnnd des anderen dages mit / Silemisszen dar de perner capellene vnnd alle altaristen vnnszer liuen frowen kerke ock de custodes thokamen willen vnnd mogen vnnd deme perner sosz grote meideborgesche / penninge Capellanen vnd altaristen drȳ custers tue gegeuen scholen werden Ock schal den custers vor dy misse dar Jarlangk tho singende dorch einen sittenden Rathd gegeuen / werden szosz schillingk penninge merxsche weringe vnnd wu szodane plich vnnd borden nemelich holdinge der misszen vnnd memorien wu vorberuredt mercklick verbleue / Ock dÿ co(n)uiendista nicht personlich resideren worde dar alszo denne ein Radht alsze patronen dÿ co(n)uiende einen anderen altaristen nha lude vorgemelt dÿ gedachte plicht vnnd / borden holden wil ane mercklich vortoch vnnd Sumenissze befelen vnnd co(n)uiendiren vnnd vpp dat dussze fundatio vnnd stifftunge Inn oren artikelen vnndstucken nemeliken / holdunge der misszen nha frumisszen vnnd de memorien creftich vnnd stendich bliuen mogen hebben gnanten testamentarien alle vnnd Itzliche vorbenomeder viff / gulden tinsze Jarliker renthe vorsegelden kopes orenes [?] deme werdigen vnnd Ernhaftigen Ern deken vnnd Camereren der kalandes bruder tho Borch auer antwert dÿ dussze / Stiftunge nha oren besten vormoge(n) willen helpen tho fullenden vnnd bÿ craft vnnd macht tho beholden wu auer ein szodans dat godt wende Jo nicht geschege vnd / vpp ansuken der gedachten Ern deken vnnd Camerers sulke co(n)uiene nha Inholde dusszer fundation nicht befalen In maten vorberurdt worde binnen twen mannden / schal alszo denne sulke befelinge gestifter co(n)uienden szo vele dusszer fundatien betreft den gnanten Ern deken vnnd Camereren tho stan vnnd geboren an craft vn(n)d / macht dusszes breues Desz tho Orkunde vnnd Bekentenissze hebben wÿ Burgermeistere vnnd Rathmanne deken vnnd Camerer der kalandes bruder tho Borgh / ergnant vnnsze Ingesegele hangen laten ann dusszenn apenen breue Dÿ gegeuen Isz nha Cristi gebuͤrth dusentveherhundertdarnach Im achtvnndnegentichsten / Jare Inn der vigilien Johannis Baptiste /