Jn godes namen amen . Wy Broder hermen van werberghe . eyn ghe meẏne bydegher . der huͤse . brodere .vnde des guͦdes des orden / sunte Johannes van Iherusalem . in sassen . marken . wentlande vnde Pomerenen . Be kennen openbar allen dy dessen brẏf . seyn . horen / eder lesen . dat wẏ van vnses orden weghene . laten van deme huͦse . dat her Hennẏngk van wardenberghe . ghe buͦwet heft van syneme / guͦde in der stat tu Dancyk . Nach willen vnde rade vnses lyeuen heren van prutzen des meẏsteres . der Erbarn Rathman vnde / Borghere tuͦ Dancyk . vnde willen weder sye nẏn erue buͦwen eder hebben tu Dancyk . Van deme vor sprokenerue dat her hen/nẏngk van wardenbergh buͦwet heft vnde Otto paryse vppe laten dat late wy van vnses orden weghene af . al so dat Otto parẏs hern / hennẏnghe dar ẏnne herberghe syne daghe . oder . also lange dat . hern hennẏnge euen kuͦmt . were och Otto parẏs hern Hennẏnge / sculdich wente de orde hern hennẏnges erfname is . dat scolde de orde Otto parẏse met redylcheyt vmme manen . gulde ouer otto / parys hern hennẏnge bẏ hern hennẏnges leuende so ene wuͦrde parys van des orden weghen nicht ghe manet . Desse bryf is / ghe gheuen vnde screuen tuͦ dem Rozẏk Jn den Jaren godes . dusent . drẏ hundert . ses vnde veftych . des sundaghes na deme nygen / iare . Tuͦ eyner be thugynge desser dẏnk . so is vnse ingheseghel ghe hangen an dessen brẏf /