Wy gherart meye vnde Egbrecht g(ri)peswold Ratlude tho ryge hebben ouer en / ghedreghen van vnser stat weghene myt Joh(ann)es El(b)inghe deme armborsterere tho / dantzike in desser wyse dat men eme scal gheuen alle jar twe mark ryges / vnde ene halue last roghen dar tho scalme ene cleden like des stades knapen / ok scal he vrig sin van vnghelde dat vnse borgere vt gheuet alsze van wachte / vnde van schote vnde scal hebben vrighe hus hure des scal he alle jar up antworden / up dat rathus tho ryge ver guͦde bank arnborste vortm(er) scalme eme lonen dat / redelik vnde thidelik js wat he betert van olden arnborsten vnde van notstallen / desse dingh su(n)t ghe schen tho dantzike na godes bort drutteyn hundert jar vnde sos vnde sostich jar in dem daghe vnses heren hemmeluart in jeghenwordicheit / vnser borgere ludbrecht ostinehuzen vnde Tymme holsten .