Vor alle(n) luden De dessen breff zeen effte hore(n) lesen Bekenne ik Schipper hans borupp to Danczk Dat ik Rechter vnd witliker / Schult schuldich bin Dem vorsichtige(n) ma(n)ne Clawes Drageheym borger darsuluest to Danczke dessem bewyser veer pun)t grote gude / vlameschen payme(n)tt(en) vnd Rechtferdiger mu(n)te Dar vor ik vol vnd all(en) entfange(n) hebbe vnd to mynen gantcze(n) willen van em wol / bin wenoget desse vorscr(euenen) veer pu(n)t grote geloue ik Schipper hans borupp vorscr(euen) mit alle(n) myne(n) Erffnamen vnd nakomlingen Dem / vorscr(euenen) Clawes drageheym effte holter desses breues vpp su(n)te michaelis dach nw negest komende to br(e)ngge(n) in vlanderen Ane / alle arge liste vnd vorder vortreck truweliken vnd entliken . wol to betalenn Weret ok Sake Dat ik er in vlandern kome(n) worde So / sal ik to sulker tyd alse ik in vlande(re)n komen weerde desse betalinge allyk wol doen vnd vnd mynes vorschreuenn(en) Dages nicht vorbeyden / W(er)et sake Dat ik schipper hans borupp vorscr(euen) de vorscr(euenen) veer pu(n)t grote(n) dem vorscr(euenen) Clawes Drageheym na aller wyse alse ik hir / to vor(e)n gelouet hebbe nicht worde betalen wat schade(n) hinder kost vnd theringe he effte de sinen des haluen neme(n) effte dar v(m)me don / worden den vnd de geloue ik Schipper hans borupp vorscr(euen) mit alle(n) myne(n) erffnamen vnd nakomlingen den vorscr(euenen) Clawes Drageheym / Sinen erffnamen vnd nakomlingen gelik don Rechten houet gude deger vnd alto male vpp to Richtenn vnd wedder to leggenn vnd ane / alle wedder Rede nye funde vnd weder vortreck truweliken to entrichtenn vnd entliken wol to betalenn An getachnisz der warheit / hebbe ik Schipper hans borupp vorscr(euen) myn Jngesegel willich vnd wetende an dessen breef gehange(n) de gegeue(n) is int Jar vnses / he(re)n Dusent veerhundert jnt seue(n) vnd veertichste Jar vpp su(n)te margearethen Ruet [?] dat was vppten twelfften dach van julio /