Ersamen leuen Vrundes wy begeren Juwir leue weten wo dat wy vnsem Radesendebaden mit namen Her Reynolt nedderhoff vnser Stat Borgermeister den wy negest vpm Dage to lubeke by den gemeynen Hensze Steden to Dage gesant hadden beuolen hadden mit juwen Sendebaden etlik Handelunge to hebbende alse van de vthsettynge des waterrechts dar wy vele anfalles van hebben hir In Vnser Stat v(m)me den zeefarenden man hir mit vns In dem rechte tovorscheiden welk vthsettinge wy wol vornomen hebben by Juw clarlick In schriften weren vnd vele clarliker denn wy daruan jn schrifften vinden vp dat vns sulk vtsettinge dessuluen waterrechts muchte van juwir Ersamcheit gesant wer­den Alse hefft vns nw dezulue vns(e)r Radessendebade wol jngebracht dat he mit juwe(n) vorschr(euenen) Sendebaden Handelynge hiruan gehat hefft de em vndirrichtet hebben wo gy sulk waterrecht wol clarlik heddet jn schrifften vnd wulden gerne gude Baden hir towesen v(m)me syn vorgeuen van vnser wegen an Juwe Ersamcheit to bringen , worv(m)me wy Juwe Ersamcheit deger frundlik Bidden dat gie vns sulk vorschreuen vtsettinge des waterrechts willet doen schriuen vnd mit eynem gewissen Baden senden wente wy de jn Radeswise vnd jngeheyme wol by vns willen doen vorware vnd bliwen vnd willen ok gerne de arbeith des Schriuelons so gie vns Dat mede vorkundigen werden wat Dat kosten wert besorgen vnd uthrichten Ok leuen frunde hape wy dat sulkent Juwer Stat nicht enkeg(e)n wesen sal Wente vele gudes dem Zeefarende mann hirvan kome(n) mach vnd juw forderlik by gode tozalicheit juwir allir vnd ok vnsir syn wert De gerechticheit desshaluen touolforende vnd to Ouende Juw leue frunde hrijnne gutwillich tho bewisende alse wy dis gantcze geloue(n) vnd truwe hebben to juwir Ersamcheit vorschulde wy gerne kegen Juwe Ersamcheit vnd de Juwen wor wy mog(e)n Got sy mit Juw sc(ri)ptum Danczik sub n(ost)ro secret anno mcccc xlvij feria sec(unda) Natiuitatis marie /