Wy Borg(erme)ster vnd Rathmann(e) der Stat Danczik doen kunth vnd openbar / allen vnd itczliken de dissen Breff zehen horen edder lesen dat de ersa(m)e / her Reynolt neddirhoff vnsir Stat Borg(irme)ster h(e)r Johan vam deme / Wolde vnses Rades medecompan de Beschedene hans zegebade vnse me-/deborgher vnde pauwel Coerdes jnwoner des landes hebben van den / Ersamen h(ere)n Borg(erme)ster(e)n vnd Rathmann(e) der Stat Bremen vnde / den ere(n) hundirt vnd lxxv Rynssche gulden entfangen touoller ge-/noge vp martin Anno et(cetera) xlviii van des ander(e)n t(er)myns wegen / dat desuluen van Bremen den vorgen(ann)t(en) p(er)sone(n) schuldich / weren van des schaden wegen den desuluen van Breme(n) den / vorber(orden) vnsen Borger(e)n vnd p(er)sonen An Thom [...] vnd Peter / jorssen Schepen jn der zee uth Schotlande segelnde gedan hebben / daruan denne eyne vorlikinge vnd entschedinge na uthwisinge / vnd jnholdinge eynes openen vorsegelden Breues van vnses /gnedigen h(er)ren homesters to prussen is befestent vnd co(n)formeret / Hirv(m)me so geloue wy Borg(er)meister vnd rath(manne) der Stat danzik / vorben(omet) den ergen(ann)ten h(ere)n Borgermeister vnd rath der Stadt / Breme(n) vnd den eren , dat se nach de eren van wegen der vorschr(euenen) /hundert vnd lxxv Rynscher gulden wegen den vorschr(euenen) p(er)sonen / vp den vorber(urden) Sintte mertens dach , also vornoget vnd betalet / keẏne mani(n)ge edder ansprak(e) van den vorbenomed(e)n p(er)sonen nach / der eren wegen lyden solen jntokomenden tyden Wente / wy genochsame(n) vorsekoring(en) daruan entfangen hebben Jnor-/kunde der warheit der vorber(urden) sak(e) is vnsir Stat Dantczik / Secret torugg(e) hirupp gedruckt jm jare vnses h(ere)n m / veerhundert vnde Achtvndveertich Am negeste(n) ffrigdage / vor Natiuitat(is) Marie