Wy Borgermester vnd Rathmann(e) / der Stat Danczik Bekennen apenbare / in dussen schrifften dat wy den hoͤkeren / der suluen Stat hebben vorlegen vnd / vorheten dusse nageschreuene Artikell / De welke se in erem Ampte holden solen / in dusser nauolgenden wyse /

Thom ersten dat eyn ysliker in erem Ampte / mach des Sundages vnd des hilgendages / Solt Etygk vnd Smer vnd nene ander / ware alleyne des fischdages vth setten / Vnd de olderlude dessuluen eres Amptes / solen ere vorschreuen brodere de dar de / vorschreue(ne) dryer leẏge ware vth setten / des fischdages nicht panden Sunder / des fleeschdages mach men se by eynem / punth wasses panden vnd nicht hoger /

Jtem ¹ Ock vorloue wy en , dat se Gemalde talk / lichte mogen in veer tijden des Jares / veyle hebben Als an des hilgen Cristes / auende , Nygen yares auende hilgen dree / konige auende vnd an sinte martens aue(n)d(e) //

So dat se deshaluen von eren Olderluden vngepandet blyen mogen Vnd dusse / vorschreue(ne) twe Artikell solen stan alle / wege tho des Rades behach de to handeln / aff tho doende tho hogen vnd to nedderen / So vaken des deme Rade gutduncken / vnd behegelick vnd nutte syn werth / Act(um) am fridage vor dem hillighen / Sundage also men in der hilgen kerken / synget Cantate Jm jare vnses heren / dusent voerhundert vnd negenvndeveer/tichsten ²