So de borgermeister van des rades wegen let van begeringe eins gastes einen gast vorbaden , dar clage ouer kummet, welk deiner darna gesandt wert, de sal hebben van dem gaste 1 olden schilling /

So sal men alle jaer vpnemen dre deiner to rideknechte , de der duchtich to sien , se sint mank den schepeler efte mank den de de kaeltunnen hebben , de der duchtich sien to riden , den sal men iwliken eine kaeltune vorlenen vnd de solen to tage medetheen vnd ok to vorsendende , wo et noet is den sal men geuen des Jares ere nottroft also hirna folget, den dren rideknechte sal men samerwant geven 1/2 colsester laken efte dergeliken , item noch up den heruest iwliken 7 ellen grau margenborger tom hoicken , item iwliken 1 paer stefeln vnd des jares eins to voerfoten /

Dem kake des jares 1 paer staffeln vnd eins to voerfoten /

Dem wagendriver iwliken 1 par staffeln vnd eins to voerfoten vnd kein gelt nicht to vordrinken /

Wenn ein borgermeister to dage gesant wert binnen landes mit einem ratmann , de sal hebben 3 dener vnd den kock vnd eins itzliken dages , so lange he buten is , 2 scop wines vnd de ratmann 1 scopp ¹ /

Wenn twe ratmann eder ein ratmann ² alleine vtgesant wert , so salen de twe ratmann 2 knechte vnd 1 kock vnd den dach itzliker einen scopp wines hebben //

So men der Stadt grunttins inmanet vnd ingemanet heft , so sal men geuen dem stadtscriuer to vordrinken 1 gode mark /

De statknechte , de dar medegaen , so men den grunttins inmanet, vnd wen de grunttins is ingemanet, so solen se hebben to vordrinken 11/2 gode mark De den pantwagen drift , de sal hebben , wen der umme gepandet is , to vordrinken 3 gode scot /