Mẏnen vruntkiken grot touoren mẏt erbedinghe alles gude weten / sole gij mẏne leuen heren borgermeẏster vn(de) rat wo dat / vnse gnedygen heren des konyges gnade heft to vns ghevoget / her scẏber de to dansseke was v(m)me meren seken heit wyllen / to vor warende desses huses vn(de) der grense alse et got nw ghe-/voget heft vn(de) vorsumenẏsse quader lude Jt(em) leuen heren jn / dessem januere so hebbe we vnse soldener kennen lert wo dat / se lant vn(de) stede myt truwen meẏnen in noden Jt(em) leuen here(n) / se gyngen to in der not alse de wygende hir weren vn(de) noch / sint vn(de) makeden eẏnen vorbuͦnt vn(de) gingen vor vns stan vn(de) / wolden vns drenggen da wy en solden louen to geuͦende de weke / eynen rẏnschen gulden vort so seden se dat we dar vp vor-/dacht weren dat we en ver uer geuen solden vn(de) dat wolden se / hebben se en wolden nycht eẏnen dach water drẏnken edder se / wolden van hir su(m)me de wi(n)nen [?] vn(de) [...] geues [?] Jt(em) leuen heren / so neme we her scẏuer to rade vn(de) hadden vruͦchten vor eẏn / argen vn(de) screuen an vnses gnedygen heren des konẏges gnade / dat sine gnade vns worde be sorgen myt en dels van sinen ho-/ueluden den sine gnade des worde to betruwen vn(de) wẏ ok den / vruchten mede keren mochten den we van vnsen volke hadden / Jt(em) leuen heren so heft vnses gnedigen heren gnade an vns / ghe screuͦen vn(de) ghesant welke houelude van sinen soldeners / alse sine gnade scryft dat we de scolen vp nemen vn(de) doen na / vnsem vormogen en dat besce dat we konen Jt(em) leuen heren / vnse vormoghe to doende dar ys de borgermeyster her hermen / stargart dem hir ghewyset ys des huses vormoghe vn(de) vnse / vn(de) her chort van dolen dem dat ok wol wytlik ys de jw /des ok wol werden berychten Jt(em) leuen heren rogghe / des ẏs hir noch notruoft mer alle ander dynk des enbrecket /vns we kopen hir vaste rẏnder swẏn heppen gersten mer / we en hebben nergen mede to betalende vn(de) wer denouel ghe-/mant Jt(em) leuen heren dit nemet to herten Jt(em) dat volk dat /lopet van vns se wyllen ful wesen vn(de) wy en kont en des nycht / nenen se lopen en wech bij x vn(de) bij xx nycht mer vppe / desse tẏt mer got vn(de) sin werde moder de vrẏsten wii / spare juwe ghe sunt to langgen tyden

ludeke vẏnster maker