Ich Girdrud Herrn Willem Jordans etczwenn Burgermeisters zu Danczkë seligs gedechtnis eliche nochgelossenne widwe / Bekenne mit desem Briefe von freÿem gutten willen vor allen dy en sehn adir hoeren lezen das dy Ersamen und weÿzen / herren Burgermeister vnnd Ratmann(er) der Stat Thornn mit dem Ersamen Meister Egidio meynem Bruder von / meÿner wegen vnnd mit meÿnem wissen vnnd willen abgerechent haben von aller Schuld, Houptstams ¹ vnnd / Czynses den sy meynem herrn vnnd mir schuldig gewest seyn alse hirnach volget Czum irsten woren sie mir schul-/dig vor Seben jor vnnd eyn firtil Jors vorsezzennis² czinses von Sechshundert marken Houptstams von iczlichem³ jor(e) / funfczig mark das macht Summa vierdehalb hundert vnnd dreyczehndehalbe mark geringis⁴ geldes Czurechen / von fastnacht⁵ Im etc.[?] Sechsvnndfunfczigsten Jore biß vff Trinitatis⁶ Im etc.[?] dreyvnndsechtczigsten Jore Do haben / mir dy herrn von Thornn vornüget⁷ Dreyhundert marken Houptstams mit dem Czinse douon bekomende douon ich / sye geqwittÿrt habe durch Hanns Trost von Danczke meynen Machtman⁸ vnnd so bleben mir dy herrn noch schul-/dig Dreyhundert mark vom houptstam Douon sulden sie mir czinsen alle jor funfhoundczwenczig mark vnnd synt / schuldig vorsessens czinses von Trinitatis Im etc.[?] Dreyvnndsechtczigsten jore bis vff fastnacht im Sechsvndsech-/czigsten jore zurechen Summa Achtvnndsechtczig mark vnnd dreÿ firdunge⁹ So das die Summa allir obgeschreben / schuld vorsessens czinses vnnd höptguttis ist Seben hundert vnnd eyne vnnddreÿsig mark vnnd eyn firdung do / von geen ab hundert mark dy Andris Jordan meyn Stiffzon von den herren mit meynem willen hatempfangen./ Ouch sullen abgeen firczig mark dy dy herren Ludike Bïvtaw von meyner wegen haben beczalt Noch endlicher / rechenschafft So bleyben mir dy herren zu Thornn noch schuldig Sechstehalbhundert mark Eynvndvireczigk / mark vnnd eÿnen firdung Von allir schuld clerlich vff dismol ¹⁰ abgerechent an der Mittwochen nach Martini¹¹ / Im etc.[?] lxvten jore Vordan so hat sich der Ersame Rath mit mir vmb dy beczalunge also vortragen. Sie sullen / mir geben vff weynachten ¹² nestczukunftig funfczig mark vnnd czuuorior abir funfczig mark vnnd also alle halbe / jor wenn dy Schiffe mit gutten vff vnnd abgeen funfczig mark als geringis geldis also lange bis das dy Sechs-/tehalb hundert vnnd xli mark vnnd eyn firdung vol vnnd al beczalet werden Dorczu sal ich vffheben das / virdeteil des fehrgeldis yn abkorczunge meyner schuld anczuheben yns irste czu offenen wasser auch czu ende / meyner beczalunge Vff alle dese abgeschrebenen schuld habe ich empfangen yns irste firczig mark an-/bereitem gelde von den herren vff weynachten nestuorgangen Item czwenzig mark haben sie vortreten ken her / Johan Rennenberg meynem wirthe vff meyn Kostgeld Ouch habe ich empfangen Czwelfte halbe marken / geringis von der fehre Ouch haben mir dy herren czugesaget Sechczig mark geringis vff Bartholomei¹³ / nestczukunfftig czugeben Czuworem geczewgnis vnd merer¹⁴ sicherheit das dese ding also gescheen synt habe / ich gebeten den Erbarn herrn Herman Pape der Stat Thornn Geswornen Scheppen der seyn eigen Signett / vmb meyner fruntlichen bete willen hye vunndenen hot vffdrucken lossen Gescheen vnnd gegeben czuo Thornn / Am Sonnobende vor Natiuitatis¹⁵ Johannis Baptiste Im etc.[?] lxvjten [66] Jore