IN de(m)me namen gothes , Amen , Wi burchart von dher gnade ghodes Ercebischop , We bernhart von dher selben / gnade Duͦmprovest We Gotfrid Deken vnde daz capitel gemeyne , des gotes huses zu megdeburch , bekennen / des ufphelichen , an disseme geghenwerdighen brive Daz we burchart von vnser weghene vnde von vnses ghoteshuses / weghene ghetedinget haben mit vnsen lieben burgheren , von halle , vmme dy vormundeschapt , des ghutes der selbe(n) / burghe(ren) di an vns kome(n) mochte(n) Daz we vnde alle vnse nakomelinghe vns dher nicht sollen an neme(n) hir v(m)me / haben si vns gelighen vif hundert marc , steyndalches silberes , Wer aber daz we oder iegher vnser nakomelinghe / sich di vormundeschapt wolde an neme(n) an irme guthe , so solde we oder swelcher vnser nakomelinghe daz thete / den burgeren vif hundert marc silbe(re)s weder gebe(n) er he sich di vormu(n)deschapt an nemen , swenne di en bereit / weren so soldez vmme di vormundeschapt sten , als iz vor stund(e) vf ein offenbar orkunde dhisser dinghe , daz dhi / von vns vnde von vnsen nakomelinghen stedhe gehalden werden , so habe we vorbenante burchart ercebischop / vnde we bernhart dumprovest gotfrid dhi theken vnde daz capitel gemeyne des ghoteshuses zu megdeburch / dissen brif bescreben vnde beseghelt lazen mit vnsen inghesegelen , Disser dhinge sint ghezughe dhe Edele man / her borchart von mansvelt , her heyne von alsleue , her herman von wederde von warmesdorp ghenant , her otte / von welsleue vnse marschalk , vnse burg(er)e von megdeburch kuͦne dhi langhe , walther von slenstede , bertram / brandan , henni(n)g von hildensheim werner von hildensheim vnde anderer ghetruwer luͦthe ghenuͦch , Disse / dhink dhi sint geschen vn(de) disse brif dhi is ghegeben an deme jare von ghotes ghebuͦrth ober dusent Jar / drihundert iar an deme zenden Jare Jn deme thage des herren santhe Johanneses Baptisten