In deme namen goddes amen . . Wie sewevndedrittich Ratmanne tho halle . . Wie von deme dale . . Wie von deme berghe . . Wie / Meystere der Inni(n)ghe , vnde buͦrghere ghemeyne to halle . Bekennen openliken indisseme Ieghenwerdighen brieue . vmme den krich de(n) hin(ric) / von Horthusen vnde sine brodere hebben ghehat , mit , vnsen buͦrgheren von halle . dat sie des eyne gantze sone hebben mit , vns . vnde wie / mit on . also . dat sie noch wie des mit arghe num(m)er mer vptucken scolen . . Were dat , sie disse sone breken an emande beschuldighet sie die / rat dar vmme dar scolen sie tho rechte vmme komen af sie willen . wolden sie ore recht nicht , dar vore duͦn . so scoldeme sie vorwisen von / halle hundert Iar . vnde eynen dach . swie disse sone ouc an on breke . des seluen rechtes scal die rat orer den helpen ouc bekenne wie mer / vmme den krich den hinric von vriberch vnde die von Horthusen mit eyn ander hebben ghehat dat scal sin eyn gantzt sone ane aller/leye arghelist . vnde mit alle den die mit der sake begrepen sint eynehalf vnde anderhalf . Swelk orer die sone breke . dar hie sin recht . / nicht vore wolde duͦn den scal man vorwisen von halle hundert Iar vnde eynen dach . . Vppe dat . dat disse vorbescreuene sone gantz w(er)de / ghehalden sunder broc so hebbe wie ratmanne dissen Ieghenwerdighe(n) brief laten beseghelet mit vnser stad anghehangeden Ingheseghe/le . vnde mit der Ingheseghele von deme dale . vnde mit der Ingheseghele . von deme berghe . vnde mit der Meystere Ingheseghelen / der Inni(n)ghe . vnde ek hinric von Horthusen vnde mine brodere mit vnseme Ingheseghele . Vnde ek hinric von vriberg mit mime / Ingheseghele . . Disse brief is ghegeuen nach goddes ghebuͦrt Ouer dusent Iar druhundert Iar Indeme souene vnde twintuchsten Iare In / der elefdusent maghede daghe . . /