Ic Otto stele eyn burgere to halle bekenne alle den de dissen iege(n)wordigen bref sen eder / horen . dat ic dat neyste hus bi mime dore mit twelf elen lang blekes in mine(n) hof . na / des huses wide hebbe gelege(n) vlzen swarte(n) . vn(de) petiv der am(m)en twen burge(re)n to halle to / eyme rechte(n) erue . to god(des) vn(de) to truw(er) hant der p(re)dig(en) brode(ren) to halle vb eyne(n) verdinc tinses / des iares . mit alsodaner bistedinicheyt dat vor Cristina hern ludiken keselinghes / wedewe de dat hus gekoft heft vn(de) den predege(re)n brode(re)n to halle gegeuen heft vor ore sele / dat scal hebbe de wile dat se leuet . so wenne se nicht lengher en is . so scal ore dochter / kone(n)gund de closter vrowe to sente Jurgene eyne halue marc tinses hebbe(n) an deme hus de / wile dat se leuet . Vort mer . is dat also dat de vorgenomeden brode(ren) . vormunde(res) wandelen / willet . so scal it otto stele eder mine eruen twen eder dren anderen man(n)en de se dar to / kesen to goder vn(de) to truw(er) hant ligen . also bestedeliken . dat ic vn(de) mine eruen scolen / al vnse recht behalde(n) also eyn burge(re) to rechte behalden scal an sime egenen dat he vor / eyn recht erue gelegen heft . To eyner betuginghe disses kopes vn(de) disser liginghe / so hebbe ic min ingezegel gehengen an dissen iegenwordigen bref . Dar heft ouer / gewesen . Joh(ann)es stelen . Nicolaus leuing hildebrant keseling de alde vn(de) heyso sin vedde(re) / Conrad marquardes . herma(nne) stanes . busso kophar . vn(de) disse vor genomeden vormu(n)dere / beyde . Disse brief de wart gegeuen na godes bort dusent iar . drehundert iar vn(de) negene vn(de) tvintich iar . in sunte valentines dage . /