In deme namen goddes amen . Wie .. Ratman(n)e .. dẏe meẏstere .. dẏe von dem Berghe .. dẏe von deme Dale / vnd .. dẏe buͦrgere gemeẏne tuͦ Halle alle den dẏe dissen ẏegenwerdigen brief seen oder hoͤren / heẏl in deme , dẏe eẏn mẏlde wedir gheuere is aller guͦden werke , Dẏe dẏng dẏe vnvor-/ghengelik blẏuen muͦten , vnd ewẏghe macht vnd kraft hebb(e)n scoͤlen , des is not , dat man / dẏe bevestene vnd bestedige mẏd openen Hantvesten vnd brieuen . Hir vm(m)e so duͦ wetlik vnd / kunt alle den ẏeghenwerdigen , vnd dẏe noch tuͦkumftich sẏn , Dat vnse Buͦrgere gemeẏne / eẏnes goͤdeliken werkes beghuͦnt hebb(e)n tuͦ troste vnd tuͦ eẏme ewẏghen sielgerede beẏde der / leuende vnd der doden , Durch disser gnade willen so hebbe wie gebuwet eẏn Hus bẏ sente / Nẏcolaus Dore , dat scal sẏn eẏn Herberghe allir armen luͤde , dẏe siek vnd kranck sẏn , / dẏe siek selue(n) nicht behelpen moͤghen , vnd ouk alle der armen luͤde dẏe vppe kerchoͤuen , / oder in den Ghazzen liggen vnd welk notdorftich sieke in dat Hus nicht enwelde(n) , dẏe / scal in vnser stat nicht blẏuen . Dit selue Hus scal ouk sẏn herberghe allen enelenden / krancken luͤden dẏe notdorftich sẏn . Ouk scal in deme Huse nicheẏn Priester noch nẏemand / gewalt hebb(e)n sunder dẏe scheffer oder dẏe vormunde des Huses dẏe von vnser stat / weghene dar tuͦ gesat is vnd gekoren vnd dẏe scheffere des selue(n) Huses scal dar bẏ ¹ blẏuen dẏe / wẏle id deme Rade beheghelik is , Ouk scal nẏemand Proͤuende koͤpen in deme seluen Huse , / oder vorkoͤpen vd deme Huse , siek en scal ouk nẏemand tuͦ deme vorgenanten Huse / halden in der wẏse , dat he sẏnes selues nuͦt eder vrome(n) weruen oder scheppen wille / sunder alleẏne dẏe armen vnd dẏe sieken luͤde in der wẏse alz hir vor beschreuen stet / auer dẏenstknechte vnd dẏenstmeẏde moͤghen oͤr lon wol dar ẏnne vordẏenen / Wolde ouk ẏemand duͦrch got vnd duͦrch dẏe werk der barmherticheẏt wat eẏghenes / oder geldens ghuͦdes in dat vorgenante Hus gheue(n) , dat mach he wol duͦn , dar ane / bricket he nicht wedir vnser stat willekoͤre , he en daruet ouk nicht vorboͤten / Vp eẏn openbar orkuͤnde vnd eẏne ewighe vestenu(n)ge alle disser vorbeschreuenen / dẏnge dat dẏe sunder brock stede vnd ghantz ewichliken gehalden werden , so hebbe / wie vnser stat ẏngeseghel an dissen brief gehangen Na goddes gebort Dusent iar / Druͤhu(n)dert Iar in deme eẏnvndvertighesten Iare in vns(er) vruwe(n) aue(n)de Wvrtmiss(en)