Wie her Marckwart von der gnade goddis prouest . . her hans Drelitz priol vnde / die couent gemeyne , des goddis huses tuͦ sente Mauritius tuͦ halle , Bekennen openliken an / disseme ieghenwerdighen brieue , dat wie . . vnde vnse , couent gemeinlicken , vns vor wille/koret hebben vor den buͦrgeren tuͦ halle , dat vnse goddis hus scal hebben , eygens guͦdis / in deme duͦtzschen bornen tuͦ halle sesvndedrittech pannen , in der metritten seue(n)teyn pan/nen , in deme windischen bornen twelf pannen , vnde nicht mer , bouen disse vor gnanten / tale , in allen bornen , Wier auer dat vnseme goddis huse , wat guͦdis in allen bornen / geuen wuͦrde , tuͦ sielgerede , oder mit kinderen , oder an vnses goddis huses schuͦlt , oder / von welkerleyge sake , alsodan guͦt vnseme goddis huse , tuͦ vallen mochte , dat scolle / wie vor kopen , in den nesten viere weken , dar na , vnde scollen des nicht behalden =/ Diede wie des nicht , so scolden die buͦrgere vp nemen , vt al deme guͦde , dat wie / in allen bornen hebben , swat dar vt viele also lange , dat wie , dat guͦt vor koften =/ vnde swat vt deme seluen guͦde , genomen wuͦrde , des scolden vns die buͦrgere / nicht weder geuen , Vp eyn openbar orkunde , disser dinghe , dat die stede , vnde / gantz , von vns , vnde vnseme goddis huse , ewichliken , gehalden werden , so hebbe / wie her Marckwart die vorgnante , vnse , vnde vnses couentes inghesegele =/ an dissen brif gehanghen , Na goddis gebort , Dusent jar , druhundert jar =/ in deme druͦvndevirtegesten jare , jn dem palm auende /