We Otto von der gnade goddis Ertzebischop des hilgen Goddeshuses tuͦ Meydebuͦrg be kenne openliken / an disseme ieghenwerdigen briue , Dat we vnsen truwen vnde lieuen burgeren von halle hebben redeliken / vor koft vnse Jodendorp tuͦ halle mid alleme rechte alsit vnses Goddeshuses ge wesen is , vnde louen / on dar ouer tuͦ geuende vnsen briͤf mid vnseme vnde vnses Capitels ingesegelen besegelt , twischen / hir vnde Wẏnachten d nu aller neest tuͦ komende is , Vnde dat disse ding vuͦl toghen werden , so / hebben ge louet mit vns , vnde vor vns , die Edelen herren her Busse von Scraplowe die eldere her Busse / sin sone die iungere , die Erbarn herren her henrich prouest tuͦ deme Nẏgen werke , her Henrich / prouest des Goddeshuses sente Mauriciuses tuͦ Halle , vnde her hans schroye Riddere , Vnde en worden / disse vor gescreuene ding von vns nicht vuͦl toghen vor Wẏnachten , so scolden disse vor ge namen / Borghen tuͦ Halle then in eẏne Herberge vnde scolde dar inlegher halden alse inleghers recht is , / vnde vd der stad nicht tuͦ komende , disse vor ge screuene ding worden vuͦl toghen , oder sie en deden / dat mid der Ratman(n)e wille(n) , Were ouk , des god nicht en wille , dat der ergenanten Borghen eẏn / vnder der tẏt aue ginge , so scole we eynen andern in des stede in verteẏnachten weder setten , dar on / an ge noͤghe , Vp eẏn openbar orkunde disser ding , dat die stede vnde gantz sunder brok ge halden w(er)de(n) / so hebbe we vor ge nante Otte Ertzebischof , vnse ingesegil ge henget laten an dissen briͤf , Vnde we / Busse von Scraplowe die eldere Busse sin sone die iungere Henrich prouest des Nẏgen werkes bi Halle / Henrich prouest sente Mauriciuses tuͦ Halle vnde Hans scroye riddere vor ge nanten beken(n)en dat we / vor vnsen herren hern Otten vor ge screuene Ertzebischope hebben ge louet vnd louen an disseme ieghenwerdi=/gen briue alle disse ding alse vor ge screuen sin , stede vnde gantz tuͦ haldene , vnde tuͦ eyner openbaren / be kentnisse disses ge loͤuedes , hebbe weergenante(n) Borghen alle , vnse ingesegele ge henget an dissen briͤf / Ge geuen na goddes gebort Druteynhundert Jar Jn deme enen vnde veftigisten Jare in sente Matheus / daghe des hilgen apostelen /