Von goddes gnaden we Prouest Jan . Vor lutgard von delmenhorst Ebbedesche . vnde de / ganse samnighe des closteres to winhusen . Bekennet in desseme openen breue de beseghelet / is mit vsen beyden ingheseghelen . dat we hebbet ghelaten vnde inde were ghewiset . wernere / vnde woltere von Osbernshusen . knapen . vnde alle eren rechten eruen Sesteyn korf stede / vnde alle dat we rechtes hadden indeme watere manght erer vischweyde is . dat to vseme / seken ammechte horde vor enen kothof dar greue vppe wonet . vnde vor enen acker vpme / velde . vnde vor ene halue lodeghe mark . de werner van vs heft vp ghenomen . eweliken to / besittene vnde to beholdene aldus dane wis . Schude deme Clostere in vortganden tyden in / deme kothoue vnde indeme ackere vnde dat dar to hort ienegherleye hinder dat se nicht ent=/weren nekonden oder ne welden wanne we et se weten leten . so welde we en weder laten / eren acker vnde eren kothof vor ghe noͤmet . vnde se scolden os weder gheuen ene halue lode=/ghe mark . vnde de sesteyn korf stede . vnde wat we rechtes hedden ghe had manght erer visch=/weyde . dat scolden se os weder laten mit alleme rume vnde reke . Dit is gheschen na goddes / bort dritteyn hundert Jar indeme seueden vnde vefteghesten iare to sente Jacobes daghe .. /