We Johan van dagheuorde Johan sporeke mins heren puͦtker van luneborch vnde Johan van dem appelle be kennet / openbar an desseme ieghenwardeghen breue de witleken be seghelet is mid vsen Jngheseghelen vor al den de on / seen vnde horet lesen . dat we hebbet ghe deghedinghet . twisschen hern Jane van odbernshusen dem perner / tho vallersleue vnde sinen broͮderen . vnde eres broder sone seghebande . vnde ver Mechtilde de eres bro/der huͦsvrowe ghe wesen hadde . deme god gnedech si . also dat desse vor schreuene her jan . heft ghe gheuen / vnde gansleken beret mid redeme ghelde desser vorschreuenen vrowen ver Mechtilde vertech lodeghe mark / Bru(n)sw(e)cher wichte vnde witte . vor al ere liftuͦcht de se hadde van gheuerdes weghen ghe had deme god / gnedech si . vnde se en schal . vnde nement van eres hetes vnde van erer weghen dar mer vp saken / Ok so heft er desse sulue her jan beret seuen lodeghe mark . vor sat vor varende haue vnde vor al dat / dar desse vrowe recht mochte tho hebben . dar tho heft desse sulue her jan guͦlden schuͦlde van sines / broder weghen vnde sines sones de hir vore schreuen steit . sestein lodeghe mark . dit is nuͦ de / suͦmme desses gheldes . dat her jan vtte gheuen heft . dre vnde sestech lodeghe mark Bru(n)swecher wichte / vnde witte . Tho ener be thuͦghinghe alle desser stuͦkke de hir vore schreuen stan . dat we dat hebben / huͦlpen ghe deghedinghet so henghe we alle de hir na ghe schreuen stan witleken vse Jngheseghele / to desseme ieghenwardeghen breue . harneit van Marnholte . henneke Meltzingk nuͦ tho desser tit / voghet tho ghifhorne . Borchert van dem appelle . wasment van Mortze . weret sake dat we vmme / desse deghedinghe ghe vraghet worden . vnde dar tho ghe Esschet worden . so scholde we vnde wolden / der be kennen alse hir vore schreuen steit ane iengherleige weder sprake vnde vor toch / Desse bref is ghe schreuen vnde ghe gheuen na goddes bord dritteinhuͦndert jar jndem dre vnde / sesteghesten iare jn dem hilghen daghe suͦnte Johannes Baptisten tho middensomere /