Ik Busse von Wydzerode beken(n)e openlicken , in dyssem brieue , Dat ik me , den Erberen Luͦden den / Burgern von Halle twischen hir vnd sente Michahels daghe , die nv erst tuͦkomende wirt tuͦ / dyͤnste gedan hebbe , alzo dat ik oͤn mit twintich manne(n) gewapent bynnen der tyd dyͤnen / schal vnd komen , wenne syͤ , dat von me eysschen , achte daghe tuͦ vorn , vnd af sick dat / vortoghe , eynen dach oͤder twene , dat schal myͤ nicht stan tuͦ varen , Vnd wan ik vnd(e) dyͤ / mynen , vd miner Herberge ryden , so scoͤllen dyͤ vorgn(an)ten Burger(e) me vnd(e) den mynen / vor schaden sten vnd wedder in myne Herberge tuͦ komene , vnd wan ik oͤn kome , alze manigen / man ik oͤn bringe , alze manich schot gross(chen) smales geldes scoͤllen syͤ , me tuͦ vorn gheuen , vnde / des geldes hebben syͤ me vyf schot riede(n) wol betalet , Ouk scoͤllen syͤ me , vnd(e) den mynen / Brot vuͦder vnd hufslach gheuen , nicheyne pantequitu(n)ge scoͤllen syͤ duͦn , Ouk schal ik vnd dyͤ / mynen , dyͤ tyd ouer byͤ oͤn blyuen , af syͤ dat hebben willen , vnd wie scoͤllen vns von oͤn bynnen / des nyͤmande then laten , noch wedderropen , Vnd wiere dat wie ses weken oder min by oͤn / bleuen , so scoͤlden syͤ vns haluen solt gheuen , bleue wie auer bouen , ses weken , vnd(e) endorften / syͤ vnsir dar na nicht tuͦ dyenste , welke tyd dat were so scolden syͤ vns(en) vuͦllen solt gheue(n) / io dem manne vyf schot gross(chen) smales geldis , Wiere ok , dat ik oder dyͤ mynen in orem dyͤnste / an perden ienigen schaden nemen , des got nicht enwille , so scoͤlden syͤ twene man kiesen vnd(e) / ik twene , wat dyͤ viere syͤ vm(m)e die perde hieten duͦn , perde vm(m)e perde , oder riede gelt / dar vor tuͦ gheuene , dat scoͤllen syͤ duͦn , vnd sick nicht dar wedderleggen , Tuͦ eynen wet/licken orkuͦnde , alle dysser vorbeschreuenen rede , hebbe ik min yngesegel an dissen brief / gehenget , Na Goddes gebort Dretteynhundert iar In dem sovenvndsestigesten Jare . Jn der / myͤddeweken in den Osteren , /