We hennigh vn(de) werner harneẏt vn(de) diderik brode(re) knapen alle ghe heten van otb(er)nshusen / be kennet vn(de) betuͦghet openbare in disseme openen breue dat we us des vnderander ver=/willekoret hebbet welker user wat winne den vrome(n) schal he hebb(e)n ane den ande(re)n nimpt / he ok schaden den schal he ok liden ane den ande(re)n , were ok user welk ute dat us allen ghulde / neme de schaden dene schulle we alle mede stan . ok hebbe we us des verwillekoret alle dewile / dat werner use vader leuet dat user nen use erue vorkopen eder versetten en schal dat ome tho / boren mach . worde auer uses vader alto kort vn(de) we delen scholden so scholde harneẏt vn(de) diderik / hebben to voren seuenevn(de)twintich mark luneborger pen(n)ighe in user aller erue vor ere del / der pen(n)ighe de we do to samene hadden dit hebbe we mit will(e)n uses vader rade ghe dan . dit loue / we stede vn(de) vast tho holdende vn(de) hebbet use Jngheseghele mit will(e)n ghehengt an dissen bref . vn(de) ik / werner erer aller vader vn(de) seghebant knif hebb(e)n hir ouer vn(de) an ghe wesen vn(de) des to ener / betuͦghinge hebbe we ok use Jngheseghele ghe hengt an dissen bref de ghe gheue(n) is na Goddis / bort dritteẏnhu(n)dert iar i(n) deme verevn(de) seue(n)tighesten iare i(n) sunte Gallen daghe /