We hinrik vnd lambert brodere geheten van alden hinrik van alden desses vorbenompden hinrikes sone / vnd luder van alden Bekennet vnd betuget an dessem openen breue vor allesweme dat we hebbet / gelouet vnd louet anguden truwen myt sameder hant hennynge van obbernshusen vnd(e) sinen rech/ten eruen vor Siuerde van dem bernebroke vnd sine eruen dat se en bynnen dessem negeste(n) iare / vnd dage na vtghifte desses breues schullet behulpe wesen vnd helpen dat en gelent werde tho / enem rechten lene de thegede to hagene myt alle siner tobehoringe van den here(n) dar he af to / lene gheit : were auer dat desses nicht en schude bynnen desser thid also vorgescreuen is alse dat / en de thegede nicht gelent worde : vnd we dar vm(m)e gemant worden van den van obbernhusen / eder ere(n) erue(n) eder de manynge van erer wegene kundiget worde van erer weg(en) an vnse wonynge / dar na bynnen den negesten ver weken na der manynge schulle we vnd willet en bereden / vertich mark vnd hundert mark lubesch beredinge alse to luneborch ghinge vnd gheue is Eder / schullet en des behulpe wesen dat en desse vorbenompde tegede ẏo lent werde . Alle desse vor/benompden stucke loue we hinrik lambert hinrik vnd luder alle geheten van alden vornompd / dessem vorbenompden hennynge van obbernshus(e)n vnd sinen eruen anguden truwe(n) stede vnd(e) / vast to holende ¹ ane allerleige list : vnd hebbet des to ener meren betughinge vnse Jngesegele / witliken an dessen Breff gehangen na godes bort dusent vnd drehundert jar dar na an dem / seuen vnd achtentigesten jare des dinxsedages an den pinxsten /