Ek werner von Bodendike Bekenne vor mẏ vnde myne erue(n) / dat ek schuldich ´Bin rechter schult segebande von odbernshusen vnd(e) / sine(n) erue(n) nege(n) vnde twintich mark luneborger pen(n)ige de ek ome / Betalen schal vnde wille nuͦ to Pinxste(n) dede negest to komende sint / ane jengerleige list hinder efte vortoch To Beterer wissende sette / ek ome to borge(n) mẏne(n) fruͦnd de hir na gescreue(n) steẏd Ek werner / von odbernshuse(n) Bekenne in dessem sulue(n) breue dat ek hebbe gelou(ed) / vnde loue entruwe(n) vor wernere von Bodendike vnde sine erue(n) vnde / mid one segebande von odbernshuse(n) vnde sine(n) erue(n) nege(n) vnde twintich / mark luneborger pen(n)ige to betalende in allerwise alze vorgescreue(n) / is mid redem gelde eder mid genogede(n) pande(n) dar he sines geldes / midde bekome(n) konne(n) dat ek sakwoldege vnde Borge alle desse / vorsc(reuen) stucke stede vast vnde vnvorbroken holden schulle(n) vnde wille(n) / ane jegerleẏge list hinder eder vortoch dat loue we entruwe(n) vnde / hebb(en) des to orkunde vnde to eẏner apenbare(n) bewisinge vnse Jng(esegele) / gehengt late(n) an dessen Breff na der Bort Cristi dretteẏnhundert . jar / in deme achte vnde achtentegeste(n) jare des sondages to miduasten /