Ik seghebant van obbernshus(en) Be ken(n)e ope(n)ba(r)e Jn dessem jeghenwardeg(en) b(re)ue dat ik hebbe / vor koft henni(n)ghe van obbernshus(en) vn(de) syne(n) erue(n) ene mark gheldes in myneme houe to / Hou(er)e Jn lande vn(de) an wysche vn(de) in aller to behoringhe [dat] ¹ hen(n)igh dar vt neme(n) schal / eder syne erue(n) to allen su(n)te mychaeles daghe vn(de) hebbe ene bet in de wore were dat dat / de hof woͤste worde So schal syk hen(n)igh eder syne erue(n) vnder wynden des houes bynne(n) / vn(de) buten vn(de) la(n)des vn(de) wysche vn(de) al de tobehoringhe alzo langhe bet he dar vte heft ene / mark gheldes eder syne teyn mark weder Ok hebbe jk seghebant vn(de) myne erue(n) de gnade / be holden bẏ hen(n)i(n)ghe vn(de) bẏ syne(n) erue(n) dat we moghet de mark weder kopen to allen pinxsten / jcht we on dat vor ku(n)deghen jn den veer hilgh(e)n daghen to paschen vn(de) moghen de mark / gheldes weder kopen vor de vorscreuene² teyn mark luneb(or)gher pen(n)i(n)ghe .W(e)n jk seghebant / vn(de) myne erue(n) schult hen(n)i(n)ghe vn(de) sine(n) erue(n) des kopes rechte werende wesen Dyt loue jk / seghebant vn(de) myne erue(n) stede vn(de) vast to holdende su(n)der jengherleye arghelyst vn(de) hebbe / des my(n) Jngheseghel ghe henghet an dessen bref vn(de) jk her johan van obbernshus(en) vn(de) her / wolt(er) myn broder Be ken(n)et des dat dyt myt vnseme wyllen vn(de) vulbort gheschen is / Desse bref js ghescreue(n) Na goddes bort drytteynhu(n)dert jar jn deme neghen vn(de) neghe(n)teghesten / jare des sondaghes der hilghen drevaldecheyt /