In goddes namen amen . We de Rad vnde borgh(er)e ghe mene disser stede Goslere . Bruneswich . Halberstad . Quedelingeborch . vnde Aschersleue . bekennet in disseme breue . dat we dorch / vredhe vnde vromen des landes mit gudem willen endrechtliken vns vnder en ander hebben vorbunden vnde vor enet . van stunden an Wente to deme neghesten sunte Micheles daghe , / vord ouer dre Jar . alsus . alse hir na bescreuen is . , we disser stede eder erer borgh(er)e Jeneghen vor venghe an Roue . an brande . an Morde . an Wunden . an Vengnisse . eder Jeneghen scadhen / dede . dhe vestinghe werd were . also . alsemen eme nenes rechtes en weygherde . wolde he des nicht weder don . dorch bede , noch dorch maninghe willen , der stad eder dher borgh(er)e , den de / scadhe schen were . wanne se den vorlouet eder vor vestet hedden . vnde se dat den anderen steden vor kundegheden , moͤchten se en nicht helpen binnen veir weken minne eder rechtes / vmme den scadhen . so scolde iowelk disser stede . den vredebrekere . vor louen eder voruesten . liker wis alse de stad eder dhe borgh(er)e den ghe schen were de stadhe . Der vorsten en scalmen / nicht voruesten . sunder wat iowelk stad mach vor dhe anderen bidden vnde manen de seluen vorsten . dat scullet se don vnder enander mit guden truwen . Ok scolen disse stede vphol=/den vnde hinderen disse voresprokenen vredebrek(er)e wor se moghen . Worde der Jenich ghe hinderet . so scolde men dat weten laten dere stad , eder den borghe(re)n den de scade ghe schen were . / de scolden dar senden clegh(er)e mit der stad breue . den scolde de Rad helpen richtes ane vare . Den seluen vredebreke(re)n scalme nene vorword gheuen . dat en si mit willen der stad . der dhe / scade ghe schen is . Wolden auer de vredebrekere deghedingen mit der stad . eder den borghe(re)n den de scade ghe schen were . vmme de sake . dhe moghen en vorword gheuen to den tẏden . vor / liket se sik mit en so scoldemen se vth der vestinghe . laten , dat scoldemen den ande(re)n steden . kundeghen dat se , se ok vd der vestinghe leten . Were ienich borgh(er)e de disse vredebrekere(n) / vorderde eder heghede(n) weder recht , des he nicht vnsculdich moͤchte werden . de scolde like schuldich wesen . we ok disse vredebrek(er)e heghede eder helde . deme scoldeme dat vorkundegen / vd der stad . der de scadhe gheschen were - dat he se lete binnen verteẏn nachten . eder hulpe . dat de scade weder dan worde . scheghe des nicht so scolden de stede dar na binnen veir we/ken , sik des vor enen wat se dar to don mochten . also , alse dat dem lande vnde den steden bequeme were . Welk vredebrek(er)e vorlouet eder vorvestet worde binnen disser tẏd dar disse / vorbindinghe waret . de mach des nicht los werden dat en si mit vulbord des(ser) sake wolden vnde der stede . Were dat de vorbindinghe vt ghinge doch scolde he in der ouertale bliuen vnde io=/welk stad scolde der anderen rechtes helpen vnde scaden ouer dhene seluen vredebrek(er)e liker wis alse de vorbindinghe noch stuͦnde . de wile dat he des nicht weder dede . na minne eder na=/ rechte . Ok wat van vredebreke(re)n vorlouet eder voruestet wert binnen disser tẏd . de scalme be scriuen bi namen in al dissen steden . dorch dat , dat iowelk clegh(er)e deste vast(er)e si in sineme / rechte . vnde dorch twiuel . vnde vor ghetenicheẏt to be warende . de den steden dar af mochte vallen . Deẏt Jenich borgh(er)e van dissen steden dotslach eder Wunden . dene mach men vor vesten / in der stad . dar he de dad deẏt . in den anderen steden mach he wesen vp sin recht . Dede he auer enen anderen broke dorch der dad willen , de he vore dan hedde . der he sik nicht ledeghen ne / mochte . so scoldeme ene voruesten in allen dissen steden . Were Jenech vorste , herre , eder andere lude de disser stede Jeneghe vor vnrechtegen wolden binnen disser tẏd , so scolden de anderen stede / recht vor se beden . van stunde an . wanne it en vorkundeghet worde . Woldemen des nicht van en nemen . , so scolden de anderen stede . den vorsten , herren , eder dhen luden nicht behulpen wesen / mit spise mit vodere . mit wapenden luden , noch mit nenerleẏe hulpe dar de stad scaden an nemen mochte . also langhe went se de stad bi rechte leten . Worde Jenech orloghe twischen / den vorsten de disser stede herren sint . des god nicht enwille , de wile dat disse vorbindinge waret , so moͤsten de stede ereme herren wol behulpen wesen . vnder eres herren banneren / hir an enscolde disse vorbindinge nicht to broken wesen . , Queme ienich borgh(er)e van disser stede ienegher eder ere ghesinde vor ene disser stede binnen dher tẏd dat der vorsten orloghe / warede . dorch nod . eder dorch vredes willen , de scoldeme dar in laten , vnde de scolden binnen der stad velich sin liues vnde gudes Scheghe dat , dat ouer Jeneghen vredebrek(er)e ghe rich/tet worde . Wolde Jenech man dat wreken dar na , dat scolden de stede ghemene sik an nemen efte wol disse bunt vte were . vnde helpen deme weder stan mit allen truwen , Ok / en scolde nen stad disser stede nene sone an gan sunderliken . de ande(re)n stede en worden mit en ok besoͤnet . Al disse vorbescreuenen stucke loue we en truͦwen ganz vnde stede to / holdende . To eneme orkunde vnde to ener betughinge alle disser dinge . hebbe we ghe gheuen vnde vs dissen bref beuesteget mit vsen Jngheseghelen . Dith is gheschen / vnde disse bref is ghe gheuen na goddes bord dritteẏnhundert Jar in dheme vif vnde dritteghesten iare . in sunte vites daghe dhes heylighen Merteleres , , ,