Den . Erbarn . Mannen Eren vrunden , Den Herren . deme rade . ynninghemeste(re)n . vn(de) Borge(re)n ghemene to Ascher/sleue , De Rad . Burmeste(re) . inninghemeste(re) vnde Borge(re) to Halberstad ere willige denst vnde stede vruntschap . nu / vnde in allen tyden . Wye scriuen vn(de) openbaren iuwer wisheyt vser stad recht . dat we an vsen beckeren . vn(de) / an Bacwerke hebben , vnde also men dat in vser stad na rechte plecht to haldene , De Burmeste(re) de vser stad ge=/suoren hebben , Moghen dat Brod beseen . daret veyle is , wo dicke se willen in der weken , an welken brode / en misseduͦnket . dat sines gheldes nicht wert en is , Des nemen se en del op to sech , vnde heten dat andere / in legghen . vnde beschuldighen den Becke(re) vm(m)e den broke , de broke steyt oppe vere schillinge , Were och / dat der becke(re) meste(re) welden spreken bi erme Ede , dat , dat Brod siner penninghe wert were , vn(de) de bure=/meste(re) spreken bi ereme ede , dat et siner penninghe nicht wert en were , so gheyt der burmeste(re) ed vor den / ed der becke(re)meste(re) , Och mach men grofbrod vn(de) bretzstellen , vn(de) witbrod lang eder senewalt sellen oppe=/me kerchoue tvye inder weken . vor middaghe van dren penninghen . van tven van ereme . min eder mer / wo sech dat ghevoghet , Welch vromede man . eder vromede luͦde mid waghenen . brod in vse stad varen es / to verkopende , de en mach nen vser borge(re) vormiddaghe an erme kope vn(de) an erer velinge hinderen , Dat / dit vser stad recht si , dat bethuͦge we in disseme breue , Den we hebben . Mid vnser stad ingheseghele tru=/welken gevested , Disse bref is ghegheuen . Na Goddes Bord . dretteynhundert iar in deme verthegest(en) / jare to lechtmissen