We Des Rades meste(re) . De Rad . Inni(n)ghemeste(re) . Der meẏnheẏt meste(re) . vnde De gantze meẏn=/heẏt Der borgh(er)e beẏder stede Quedelingheborch . bekennen openberliken Indisme breue . Dat / we os endrechtliken vorbunden vnde vor ened hebben eweliken . mit Den erbaren mannen . / vnsen vrunden Deme Rade . vnde Den borghe(re)n ghemeẏne Der stad to halberstad Indisser / wẏse alse hir na ghescreuen steẏd . welk vorste . greue . here . Riddere . knecht . edder / we he were . se vor vnrechtede . vnde ere vẏent worde . wanne se os Dat vorkunde=/ghen . Dat en Dat vnrecht wedder vare . also Dat se Dat vorestan willen mit erme(n) / Rechte . so schole we vnde willen . Des neyesten Daghes Dar na . alse se Dat von os ghe=/esched hebben . ent seken vnde vẏent werden . Der edder Des . vnde willen en behul=/pen wesen mit allen truwen . Were ok Dat en eẏn openbare Nod anstunde . vnde se vol=/ghe von os escheden so schole we binnen De(n) negesten ver Daghen en volghen mit alle(re) / Deme Dat we vor moghen . Were ouer Dat se beleghen edder vorbuwed worden . edder / se De viende Drunghen . edder ghe Drunghen worden von Den vienden . Dar men sik / vromen . edder schaden vor moden mochte . so schole we . wanne se Dat eschen . von stad an / en volghen ok mẏt alle . Deme Dat we vor moghen . Were Dat we nicht ent seghe=/den . vnde en nicht , behulpen en weren binnen Der voresprokenen tẏd . so schulle we en / vor Den ersten Dach gheuen vnde bereden . hundert mark stendelsches silue(re)s . Dar Na / so vor iowelken Dach veftich mark ok stendelsches silue(re)s also langhe wante we ent seghe / Den vn(de) behulpen worden . Were ok Dat we nicht en volgheden . alse we na dissen breuen / plichtich sin . so scholde we en . ok gheuen Jo vorden Dach also dan gheld alse hir voren ghe=/schreuen is . De wẏle en der volghe Nod were . Ok en schole we noch vnser borghe(re) neẏn / De viende an Jenegherhande stucken sterken edder vorde(re)n . , worde we Dar vmme be=/schuldeghed . Dar we vnse recht nicht vore don en wolden . so scholde we en . vor den bro=/ke gheuen . veftich mark stendelsches silue(re)s . worde ouer jenech vnser borgh(er)e besunder Dar / vmme beschuldeghed . Dat he De viende ghe vordered hedde . vnde en Dorste he , edder en moch=/te he sin recht dar vore nicht doͮn . de scholde vor bored hebben Drittich mark stendelsches =/ silue(re)s . Der scholde os teẏn mark to vnser stad nud . Den von halberstad vnsen vrunden teẏne / Den von aschersleue teẏne . We des gheldes Nicht gheuen en mochte . edder en wolde den / schole we vor wẏsen . Vnde he schal disser vorebenomeden stede vnwillen hebben . vnde en / beren also langhe want he Dat vorebenomede gheld berede , vordmer alle De stucke vnser / alden breue . De we en ghe gheuen hebben . Vnde anderer breue De De stede vnder eẏn ander / ghe gheuen hebben . De hir nicht ghe screuen en sin De wille we stede vnde vnvorwandeled / halden . Dat disse Dink In allen stucken stede vnde gantz von os vnde von vnsen Nakome=/li(n)ghen eweliken ghehalden werden . hebbe we ghe gheuen Dissen bref truweliken bevestened / mit vnser stede Ingheseghele Na goddes bord Dritteẏnhundert Iar Indeme Dre vnde vertẏ=/ghesten Iare Insente katherinen auende der heÿlighen Iuncvrowen , ,