We des rades meste(re) . de rad . Inni(n)ghemeste(re) der menheyt meste(re) vn(de) de ganze menheyt der buͦrghe(re) der stad tuͦ aschersl(eue) bekennen / openbare in disseme breue dat we os endrechtleken vor bunden vn(de) vor enet hebben ewichleken met den erbaren mannen vnsen / vrunden deme rade vn(de) den buͦrgheren ghemene der stad tuͦ halb(er)stad in disser wise alse hir na bescreuen steyt . Welk vorste / greue here riddere knecht eder we he were se vor vnrechtede vn(de) ere vient wuͦrde wan se vns dat vor kundeghen dat / en dat vnrecht weder vare also dat se dat vorstan willen med erme rechte So schole we vnde willen des neysten daghes darna / alse se dat von os escher hebben vntseggen vn(de) vient werden der eder des vn(de) willen en behulpen wesen met allen truwen / Were ok dat en en openbare not an stu(n)de vn(de) se volghe von vns escheden So schole we vn(de) willen binnen den neysten vere daghe(n) / en volghen met alle deme dat we vor moghen . Were auer dat se beleghen eder vor buwet wuͦrden eder se do viende drunghen / eder dru(n)ghen wuͦrden von den vienden dar men sek vromen oder schaden vor muͦden mochten so scolde we wa(n)ne se vns eschede(n) / von stade an volghen en ok met alle deme dat we vor mochten . Were dat we nicht vntsegeden vn(de) nicht en behulpen wuͦrden bi(n)nen / der vorsprokene(n) tyd so scole we en vor den ersten dach gheuen vn(de) bereden hundert mark stendalsches silue(re)s dar na io vor / iowelke(n) dach veftich mark ok stendalsces ¹ silueres also la(n)ghe wante we vntseggen vn(de) en behulpen werden . Were ok dat we en nicht / en volgheden also we na dissen breue(n) plichtich sin so schole we en ok gheue(n) io vor den dach alsodan ghelt alse hir vore bescreuen is de / wile dat en der volghe not were . Ok en schole we noch vser buͦrghe(re) nen de viende an ienegherha(n)de stucke(n) sterken oder vorderen / wuͦrdewe dar v(m)me ghesculdeget dar we nen recht vor duͦn en wolden so scolde we en vor den broke gheue(n) veftich mark ste(n)dalsches / silueres . Wuͦrde ok ienich vnser buͦrghe(re) bisundere(n) dar v(m)me beschuldeghet dat he de de viende ghevorderet hedde dar he sin recht / nicht vor dun en mochte eder en dorste do scolde vor boret hebben drittich mark stendalsches silueres der scolden vns teyne tuͦ vser / stad nuͦd den vo(n) halb(er)stad vsen vrunden teyne vn(de) den vo(n) quedeli(n)gheb(org)h teyne we des gheldes nicht gheue(n) mochte eder wolde den scholde / we vor wisen vn(de) he scholde disser vorbenomeden stede vnhulde hebben vnde vnbern also la(n)ghe wa(n)t he vorbenomede ghelt beredde . / vort mer alle de stucke vnser alden breue de we en ghe gheuen hebben vn(de) anderer breue de de stede ghe gheue(n) hebben de hir nicht / ghe screuen sint de wille we stede halden vn(de) vnghewandelet . dat disse di(n)gh an allen stucken stede vn(de) ganz von vns vn(de) von / vnsen nakomeli(n)ghen ewichliken ghe halden werden hebbe we en ghe gheuen dissen bref truwelken ghevestenet med vnser stad / ingheseghele na goddes bord dretteyn hundert iar in deme dre vn(de) vertegheste(n) iare in sente katherine(n) daghe der Ju(n)cvruͦwe(n)